भक्तपुर। नेकपा एमालेका अध्यक्ष तथा पूर्वप्रधानमन्त्री केपी शर्मा ओलीको गृहस्थान सूर्यविनायक नगरपालिका वडा नं. २ बालकोटमा एमालेका उम्मेदवारले घरदैलो कार्यक्रम सम्पन्न गरेका छन् । कार्यक्रममा स्थानीयवासीले उत्साहजन रुपमा आ आफ्नो घरघरमा एमालेका उम्मेदवारलाई स्वागत गर्दै विजयको शुभकामना व्यक्त गरे ।
एमाले भक्तपुर क्षेत्र नं.२ क्षेत्रीय प्रचार प्रसार समितिले आज आयोजना गरेको घरदैलो कार्यक्रममा नेकपा एमालेको पोलिटव्युरो सदस्य तथा क्षेत्र नं. २ का उम्मेद्वार महेश बस्नेत, प्रदेशसभाका उम्मेदवार किरण थापासहित एमाले नेता तथा कार्यकतासहितको टोलीले बालकोटमा घरदैलो कार्यक्रम गरेको हो । कार्यक्रममा स्थानीयवासीले आफ्नो माग र आवश्यकता उम्मेदवारहरुलाई राखेका थिए । उक्त क्रममा उम्मेदवारले समग्र क्षेत्र नं. २ मा ठूला माग सम्पन्न भएको र साना साना तथा आधुनिक सहर विकासको माग मात्र जनताको रहेकाले जनताको मागलाई शतप्रतिशत पुरा गर्ने प्रतिवद्धता जनाए । एमालेका उम्मेदवार विजयपश्चता बालकोटको खानेपानीको समस्या एक महिनाभित्र नै समाधान गर्ने उद्घोष समेत गरे ।
घरदैलो कार्यक्रममा स्थानीयवासीले घर घरमा स्वागत गरेका थिए । स्वागतका क्रममा भक्तपुरको विकास र समृद्धिको पर्यायावाची नाम नै एमाले भएको भन्दै स्थानीयवासीले खुसी व्यक्त गरे । जनताको सुख दुःखको सारथी बन्न आग्रह गर्दै स्थानीयवासीले एमालेका उम्मेदवारलाई विजयको माला लगाउन तयार भएर बसेको बताए ।
