काठमाडौं। अमेरिकास्थित प्रवासी नेपाली मञ्चको कार्यक्रममा सहभागी हुन आएका नेकपा एमालेका महासचिव शंकर पोखरेल एमाले समर्थक प्रवासीहरू भ्रमको शिकार बनेकोमा चिन्ता व्यक्त गरेका छन् ।
केन्टकी राज्यको लेक्जिन्टनमा आयोजित प्रवासी नेपाली मञ्चको राष्ट्रिय भेलालाई सम्बोधन गर्ने क्रममा महासचिव पोखरेलले विरोधीहरूले फैलाएका भ्रमको शिकार एमाले कार्यकर्ताहरू समेत भइरहेको बताए ।
महासचिव पोखरेलले भने, ‘यहाँ केपी ओलीका कमजोरीहरूबारे प्रश्न गर्न पाउने कि नपाउने भन्ने प्रश्न उठ्यो । कसले भन्छ पाइँदैन भनेर ।’ तर केपी ओलीले देशको पक्षमा उभिएर लड्दाखेरि विदेशीको इशारामा गरिएको घेराबन्दीको असर तपाईँहरूमा समेत परेको छ । देशभक्त नेतृत्वको रक्षाको कुरा गर्दा चाकडी लाग्न सक्छ । देशभक्त नेता, विकासको नेतृत्व गरेको नेताको पक्षमा उभिने कुरा कुनै व्यक्तिको पक्ष लिएको हुन्न । तर विरोधीहरूको घेराबन्दी र उनीहरूले गरेका कुप्रचारको असर तपाईँहरूमा समेत परेको छ ।
महासचिव पोखरेलले सधैँभरि विरोध मात्र गरेर देश अघि नबढ्ने बताए । पोखरेलले जसले देशभक्ति र विकासको नेतृत्व गरेको छ,उसलाई वैदेशिक शक्तिको इशारामा घेराबन्दी गरेको बेला उनीहरूकै एजेण्डा बोकेर हिँड्न खोजिएको बताए ।
प्रवासी नेपालीमाझ पोखरेलले भने– यस्तो बेला केपी ओलीका विरुद्ध विरोधीले चलाएका भ्रमको पछि लाग्ने कि नेतृत्वमाथिको प्रहारविरुद्ध एकजुट हुने ? नेताहरुबीच खाडल सिर्जना खोज्ने ? सत्य र भ्रमको बिचको अन्तर छुट्ट्याउन सकिएन भने सत्य स्थापित हुँदैन।
महासचिव पोखरेलले पपुलिस्टहरुले जे कुरा गर्छन् त्यही बोल्ने हो भने कम्युनिस्ट पार्टी विघटन गरे हुने बताए । उनले समाज बदल्न र समाजलाई सही दिशामा लैजान तितो बोल्न सक्नुपर्ने बताए ।
मञ्चका अध्यक्ष सञ्जय थापाको अध्यक्षतामा भएको कार्यक्रममा एमाले पोलिटब्युरो सदस्य सुजिता शाक्यले सम्बोधन गरेकी थिइन् भने विकास र भूराजनीतिका अध्येता अमेरिकी विश्वविद्यालयका प्राध्यापक डा.दिनेश पौडेल, डा.शतिस देवकोटा, छवि पाण्डे, कृष्ण ढकाललगायतले फरक विषयमा कार्यपत्र प्रस्तुत गरेका थिए।
