काठमाडौँ-ललिता निवास जग्गा प्रकरणमा थुनिएकाहरूको बयान आज पनि जारी रहने भएको छ । काठमाडौँ जिल्ला अदालतमा बयान जारी रहने भएको हो ।
केन्द्रीय अनुसन्धान ब्युरो (सीआईबी)ले ५७ दिन लामो अनुसन्धानपछि बुझाएको प्रतिवेदनका आधारमा जिल्ला सरकारी वकिल कार्यालय काठमाडौँले ललिता निवास जग्गा प्रकरणमा आइतबार मुद्दा दर्ता गरेको थियो।
सीआईबीले प्रतिवेदनमा संगठित अपराधमा र किर्तेमा मुद्दा चलाउन राय प्रस्तुत गरेपनि सरकारी वकिलले भने पश्चातदर्शी कानुन लगाउन नमिल्ने भन्दै किर्तेमा मात्र मुद्दा चलाएको हो ।
हिजो दुई जनाको बयान लिएकोमा आज एकपटकमा चार जनाको बयान लिन लागिएको काठमाडौँ जिल्ला अदालतले जनाएको छ ।
ललिता निवास जग्गा प्रकरणमा १८ जना थुनामा छन् । पहिलो चरणमा थुनामा रहेकासँग बयान लिएपछि थुनछेक बहस सुरु हुने अदालतले जनाएको छ ।
ललितानिवास क्याम्पको १४३ रोपनी ६ आना ३ पैसा ३ दाम जग्गा हिनामिना भएको ब्युरोको अनुसन्धानले देखाएको छ । चार पूर्वमन्त्री, बहालवाला सञ्चारसचिव कृष्णबहादुर राउत, गृह मन्त्रालयका सहसचिव सुशील वैद्यलगायत व्यक्तिलाई प्रतिवादी बनाइएको छ ।
