पर्सा । पर्सामा भारतीय नम्बरको गाडीको ठक्करबाट एक जनाको मृत्यु भएको छ । आइतबार राती साढे ९ बजे भारतीय नम्बरको गाडीको ठक्करबाट घटनास्थलमै एक युवकको मृत्यु भएको पर्सा प्रहरीले जनाएको हो । वीरगन्ज महानगरपालिका वडा नम्बर- १३ सरिसवापुलमा दुईवटा भारतीय नम्बरको गाडीले ठक्कर दिँदा भएको मोटरसाइकल चालक जटाशंकर पटेलको मृत्यु भएको पर्सा प्रहरी प्रवक्ता किशोर लम्सालले बताए ।
प्रदेश २ -०३-००४ प ५५१४ नम्बरको मोटरसाइकलमा सवार पटेल बहुदरमाइ नगरपालिका वडा नम्बर -९ निवासी रहेको प्रहरीले जानकारी दिएको छ । प्रहरी प्रवक्ता लम्सालका अनुसार राती ड्राइपोर्टतर्फबाट दुईवटा भारतीय गाडी आइरहेको थियो, त्यसैमध्ये एउटा गाडीको ठक्करबाट पटेलको मृत्यु भएको हो । अहिलेसम्म कुन गाडीको ठक्करबाट उनको मृत्यु भएको हो ? त्यो यकिन हुन नसकेको प्रहरीले जनाएको छ । तर ती दुईवटै गाडीसहित एउटा चालकलाई समेत नियन्त्रणमा लिएर प्रहरीले अनुसन्धान गरिरहेको पर्सा प्रहरीले जनायो । प्रहरीले ठक्कर दिएको आशङ्कामा एउटा ट्रक र एउटा ट्याङ्कर नियन्त्रणमा लिएको छ ।
