विराटनगर । सङ्घीय सरकारका गृहमन्त्री रमेश लेखकले बीआरआई सहमतिमा विवाद गर्नुपर्ने कारण नभएको बताएका छन् । कांग्रेसको कोशी प्रदेशको पहिलो सम्मेलनलाई सम्बोधन गर्दे उनले यस्तो बताएका हुन् ।
‘बीआरआई सम्झौता काङ्ग्रेसको धारणा, सल्लाह र सहमति अनुसार भएको हो । हामीले ऋण नलिने भनिसकेका छौँ । प्रधानमन्त्रीले पनि भनिसक्नुभएको छ । यश विषयमा विवाद गर्नु जरुरी छैन । अनुदान र सहायता लिने भनेका हौँ’ उनले भने ।
कांग्रेस एमाले मिलेर बनाएको समीकरण फगत केही मानिसलाई मन्त्री बनाउनका लागि मात्रै नभएको उनले बताए । ‘संविधान र यो व्यवस्थाको रक्षा गर्न, भ्रष्टाचारको अन्त्य, दिगो शान्ति, सुशासनतिर जान समीकरण बनाएको हो । संविधान संशोधनको विषय प्राथमिकता हो । संविधान संशोधनको विषयमा आन्तरिक छलफल सुरु भएको छ,’ उनले भने ।
