सना । इजरायलले गरेको तीव्र हवाई आक्रमणमा यमनमा कम्तीमा ९ जनाको मृत्यु भएको छ । हुथीको नियन्त्रणमा रहेको सञ्चार माध्यमले यस्तो बताएको भन्दै अन्तर्राष्ट्रिय सञ्चार माध्यमहरूले समाचार छापेका छन् । इजरायलले बिजुली घर, लाल सागरस्थित रास इसा तेल टर्मिनल र सलीफ बन्दरगाहलाई निशाना बनाएको बताइएको थियो । हमलामा सलीफ बन्दरगाहमा सात र तेल टर्मिनलमा दुई जनाको मृत्यु भएको बताइएको छ । यसअघि यमननले इजरायलमा हुथीहरूको मिसाइल दागेको थियो । यसलाई इजरायलले रोकेको थियो ।
टाइम्स अफ इजरायलका अनुसार इजरायली सेनाले पनि यमनमा आक्रमणको पुष्टि गरेको छ । आफ्ना युद्धक विमानहरूले हुथी विद्रोही समूहको बारम्बारको आक्रमणको जवाफ दिएको इजरायली सेनाले बताएको छ । सेनाका अनुसार इजरायली वायुसेनाले दुई चरणमा १४ वटा लडाकु विमानबाट हुथीका ठेगानाहरूमा आक्रमण गरेको थियो । सेनाले पहिलो हमलामा रेड सीमा रहेको रस इसा तेल टर्मिनल र सलिफ बन्दरगाहलाई निशाना बनाएको थियो । बन्दरगाहमा पानीजहाज ल्याउन प्रयोग गरिएका आठ डुङ्गाहरू आक्रमणमा ध्वस्त भएका छन् । यसपछि दोस्रो चरणमा राजधानी सानाका दुई पावर स्टेशनलाई निशाना बनाइएको थियो ।
