काम्पाला । पूर्वी अफ्रिकी देश युगान्डामा इबोलाबाट एक जना चार वर्षीय बालकको मृत्यु भएको छ । विश्व स्वास्थ्य संगठन (डब्लुएचओ) का अनुसार यो इबोलाबाट भएको दोस्रो मृत्यु हो । यसअघि जनवरी ३० मा इबोला प्रकोप बनेको घोषणा हुनुभन्दा एक दिनअघि एक जना वार्ड ब्वाईको मृत्यु भएको थियो । युगान्डाका स्वास्थ्य अधिकारीहरू प्रकोप चाँडै अन्त्य गर्ने आशा गरिरहेका थिए । यस्तोमा बच्चाको मृत्यु स्वास्थ्य अधिकारीहरूका लागि ठूलो धक्का भएको डब्ल्यूएचओले बताएको छ ।
बच्चालाई युगान्डाको राजधानी कम्पालाको एक अस्पतालमा भर्ना गरिएको शनिबार जारी विज्ञप्तिमा डब्लुएचओले भनेको छ । उपचारको क्रममा उनको मंगलबार मृत्यु भएको बताइएको छ । निगरानी र सम्पर्क ट्रेसिङलाई सुदृढ पार्ने काम गरिरहेको डब्ल्यूएचओले भनेको छ । सुरुमा आठ इबोला संक्रमितहरू निको भएर डिस्चार्ज भएपछि युगान्डाका अधिकारीहरूले प्रकोप नियन्त्रणमा रहेको दाबी गरेका थिए । तर, पछिल्लो समय बालकको मृत्युले त्यो दाबीलाई कमजोर बनाएको छ ।
