काठमाडौं । नेकपा माओवादी केन्द्रका सांसद जनार्दन शर्माले राजनीतिक दलहरुमा देखिएको सत्तामोह र अवसरवादी प्रवृत्तिका कारण लोकतान्त्रिक अभ्यासमा समस्या देखिएको बताएका छन् । नेताहरुको छिनाझपटीका र असैद्धान्तिक गठबन्धनका कारण पनि नेताहरुप्रति अविश्वास पैदा भएको उनले टिप्पणी गरे । प्रतिनिधि सभाको बुधवारको बैठकमा बोल्दै सांसद शर्माले भने, ‘हामीले संविधान निर्माण भएपनि मुलुकको अवस्था सुधार्न दत्तचित्त भएर लाग्नुपथ्र्यो । गणतन्त्र र जनताको जनजीविकामा सुधार गर्नुभन्दा पनि पार्टीहरुबीच र नेतहरुबीच कुर्सीको छिनाझपटी, सत्तामोह, एकअर्काप्रतिका लागिगलौच, लाञ्छना र अवसर पाउँदा सबै असैद्धान्तिक गठबन्धनमा सामेल हुने प्रवृत्तिका कारण लोकतान्त्रिक अभ्यासमा केही समस्या र अविश्वास पैदा भएका हुन् ।’
विकृत लोकतान्त्रिक अभ्यासका कारण जनतामा निराशा पैदा भएको र त्यसैको फाइदा लिने उद्देश्यले राजावादीहरुले टाउको उठाउने प्रयास गरेको भन्दै शर्माले राजतन्त्र फर्किने कल्पना भने गर्न नसकिने बताए । लोकतन्त्रको विकल्प उन्नत लोकतन्त्र भएको बताउँदै उनले भने, ‘मलाई त राजतन्त्र फर्किन्छ भन्ने डर छँदैछैन । हाम्रा कमीहरु सच्याउन सक्छौं कि सक्दैनौं भन्ने डर मात्र छ ।’ उनले थपे, ‘वंशनाससँगै समाप्त भएको राजतन्त्र फेरि फर्कंदैन । बरु समाजमा बाँकी राजतन्त्रात्मक सोच, शैली, प्रवृत्ति, व्यवहार भने अन्त्य गर्नैपर्दछ । आफैंभित्रको राजतन्त्र अन्त गर्न लाग्नु आजको मुख्य काम हो । राजतन्त्र फर्किन्छ कि भन्दै अनावश्यक आशंकित हुन जरुरी छैन, होहल्ला गर्न जरुरी छैन ।’
संविधान कार्यान्वयनको दोस्रो कार्यकालसम्म आइपुग्दा जनआवश्यकताअनुसार कानून बनाउन नसक्नु कसको दोष हो ? भनेर पनि उनले प्रश्न पनि गरे । ‘संविधान कार्यान्वयनको दोस्रो कार्यकालसम्म आइपुग्दा संविधान कार्यान्वयनमार्फत अधिकारको प्रयोग गर्ने, जनचाहाना, आवश्यकताअनुसार कानून बनाउन नसक्नु हामी कसको दोष हो ?’ उनले प्रश्न गरे । प्रदेशलाई प्रभावकारी र स्थानीय तहलाई बलियो नबनाउनुपर्ने बताउँदै उनले केन्द्रिकृत मानसिकता त्याग्न नेताहरुलाई सुझाव दिए । उनले अहिले देशमा केही पनि भएन र यो देशमा केही पनि हुँदैन भन्ने भाष्य निर्माण गर्न खोजिएको भन्दै त्यो गलत भएको बताए । पूर्वाधार विकास र मानव सूचकांकका दृष्टिकोणले विगतको भन्दा अहिले गुणात्मक प्रगति भएको धारणा राखे । तर सबै ठिकठाक छ भनेर भन्न नसकिने उनले बताए । उनले भने, ‘हाम्रो आश्वासन, महत्वाकांक्षा, आवश्यकता, नयाँ पुस्ताको सोच र छिमेकी मुलुकहरुको गति अनुरुप हाम्रो प्रगति नभएको पक्कै हो । त्यसकारण दुवै कुरालाई सही मूल्यांकन गर्दै कमजोरी सच्याउनुको विकल्प छैन ।’
