१ मंसिर २०८३, मंगलबार Wednesday, 18 November 2026
हामीलाई पछ्याउनुहोस्
१ मंसिर २०८३, मंगलबार 4:13 am
राजनीति

माओवादी पदाधिकारी बैठकले तय गर्‍यो स्थायी समिति बैठकका एजेन्डा

सूचना प्रेस २०८२ श्रावण १४ बुधबार ००:००, १७:१७ बजे १ मिनेट पढाइ

काठमाडौँ । नेकपा (माओवादी केन्द्र) ले स्थायी समिति बैठकमा पेस गर्ने एजेन्डा तय गरेको छ । केन्द्रीय कार्यालय पेरिसडाँडामा बुधबार बसेको पदाधिकारी बैठकले एजेन्डा तय गरेको प्रवक्ता अग्निप्रसाद सापकोटाले जानकारी दिए । सापकोटाले आजको बैठक औपचारिक भन्दा पनि अनौपचारिक बैठक भएको जिकिर गरे ।

‘स्थायी समिति बैठकको एजेन्डा तय गरेका छौँ । हेडक्वाटरको तर्फबाट अध्यक्षले वर्तमान परिस्थितिबारेमा ब्रिफिङ गर्नुहुन्छ । मध्यपहाडी केन्द्रित अभियानलाई निरन्तरता दिनेबारे छलफल हुनेछ । केन्द्रीय समितिको बैठकबारे मिति तय हुन्छ । समाजवादी मोर्चालाई अझ विस्तार गर्ने विषयमा छलफल गर्छ । सङ्गठन निर्माण, कार्य विभाजन र आन्तरिक एकतालाई सुदृढीकरणबारे छलफल हुन्छ । बाढी पहिरो लगायत विषयमा समसामयिक प्रस्ताव तयार हुन्छ’, बैठकपछि उनले भने ।

यस्तै आन्तरिक एकतालाई मजबुत गराउने विषय पार्टीको नियमित एजेन्डा भएको उनले जिकिर गरे । बैठकमा उपमहासचिव जनार्दन शर्माबारे केही छलफल नभएको सापकोटाले बताए । उनले स्थायी समितिको पूर्व सन्ध्यामा प्रवक्ताले अन्तर्विरोधबारे बोल्नु उचित नहुने स्पष्ट पारे । माओवादीको स्थायी समिति बैठक शुक्रबार बस्दैछ ।