काठमाडौं, ८ मंसिर । श्रीलंका र भारतको संयुक्त आयोजनामा सम्पन्न पहिलो दृष्टिहीन महिला टी–२० विश्वकपमा उपविजेता बनेको नेपाली टोली स्वदेश फर्किएको छ । त्रिभुवन अन्तर्राष्ट्रिय विमानस्थलमा नेपाल क्रिकेट संघ (क्यान) का पदाधिकारीहरूले टोलीलाई औपचारिक स्वागत गरेका हुन् । आइतबार कोलम्बोस्थित पी सारा ओभलमा भएको रोमाञ्चक फाइनलमा नेपाल भारतसँग ७ विकेटले पराजित भएको थियो ।
नेपालले दिएको ११५ रनको लक्ष्य भारतले तीन विकेटको क्षतिमा १२ औँ ओभरमै पूरा गर्दै पहिलो संस्करणको उपाधि हात पारेको हो । उपविजेता बनेको नेपालले ९ लाख श्रीलंकाली रुपैयाँ पुरस्कार पायो भने विजेता भारतले १५ लाख रुपैयाँ प्राप्त ग¥यो । पुरस्कार वितरण श्रीलंकाका प्रधानमन्त्री डा. हरिनी अमरासुरियाले गरेका थिए ।
यस विश्वकपमा नेपालका २ खेलाडीले उत्कृष्ट प्रदर्शन गर्दै फरक–फरक क्याटगोरीमा ‘प्लेअर अफ द सिरिज’ बने । ‘बी–वान’ क्याटगोरीमा सुष्मा तामाङ र ‘बी–टु’ मा मनकेशरी चौधरी उत्कृष्ट घोषित भए। दुवैले ३७ हजार ५ रुपैयाँ पुरस्कार प्राप्त गरे । नेपाली टोलीको पहिलो उपाधि जित्ने लक्ष्य अपूर्ण रहे पनि खेलाडीहरूको प्रदर्शनले भविष्यमा थप सम्भावना देखाएको क्यानका पदाधिकारीहरूले बताएका छन् ।
