तनहुँ । जिल्ला प्रशासन कार्यालयले तनहुँले चालु आर्थिक वर्षको पहिलो त्रैमासिकमा एक करोडभन्दा बढी राजस्व सङ्कलन गरेको छ ।
प्रमुख जिल्ला अधिकारी रामकृष्ण अधिकारीले सङ्घसंस्था दर्ता र नवीकरण, हातहतियार नवीकरण र नामसारी, राहदानी दस्तुरलगायतबाट एक करोड १८ लाख १५ हजार ८८५ राजस्व सङ्कलन भएको जानकारी दिए ।
उनका अनुसार सङ्घसंस्था दर्ता नवीकरणबाट दुई लाख पाँच हजार ७००, हातहतियार नवीकरण र नामसारीबाट तीन लाख दुई हजार २५०, राहदानी दस्तुरबाट एक करोड ११ लाख ५८ हजार, न्यायिक दण्ड जरिवानाबाट एक लाख ३५ हजार ४३५ राजस्व सङ्कलन भएको छ ।
यसैबीच, चालु आर्थिक वर्षको पहिलो त्रैमासिकमा जिल्ला प्रशासन कार्यालयमा ६१९ गुनासो दर्ता भएका छन् । विभिन्न माध्यमबाट कार्यालयमा गुनासो दर्ता गरिएको हो । प्रमुख जिल्ला अधिकारीले सबैभन्दा बढी नागरिक एपमार्फत ५७२ गुनासो प्राप्त भएको जानकारी दिए ।
त्यस्तै, कार्यालयमा निवेदनमार्फत ३४ र नियामक निकायबाट १३ गुनासो प्राप्त भएको उनको भनाइ छ । गुनासोमध्ये ४३४ गुनासो फर्स्योट गरिसकिएको उनको भनाइ छ ।
सेवाग्राहीका सहजताका लागि कार्यालयले क्युआरकोडमार्फत गुनासो दर्ता गर्न सक्ने व्यवस्था गरेपनि क्युआरकोडमार्फत कुनै पनि गुनासो नआएको प्रजिअ अधिकारीको भनाइ छ ।
त्यस्तै, हेलो सरकारमार्फत पनि गुनासो प्राप्त भएको छैन । प्रजिअ अधिकारीका अनुसार नागरिक एपमार्फत प्राप्त गुनासोमध्ये ३८७, कार्यालयमा निवेदन प्राप्तमध्ये ३४ र नियामक निकायमार्फत प्राप्त गुनासोमध्ये १३ गुनासो फर्स्योट भएका छन् ।
