काठमाडौं । नेपाली कांग्रेसको विशेष महाधिवेशनबाट उपसभापतिमा निर्वाचित विश्वप्रकाश शर्माले देश संविधानले र पार्टी विधानले चल्नुपर्ने स्पष्ट धारणा व्यक्त गरेका छन् । उपसभापतिमा निर्वाचित भएपछि विशेष महाधिवेशनलाई सम्बोधन गर्दै शर्माले संविधान र विधानले देश र पार्टी चल्ने बताएका हुन् । उनले भने, ‘देश संविधानले चल्छ । देशले संविधानको बाटो छाड्यो भने वेथितीमा पुग्छ । पार्टीले विधानको बाटो छाड्यो भने पार्टी पनि अप्ठेरोमा पर्छ । त्यसैले यस विषयमा हामी स्पष्ट छौँ ।’
नवनिर्वाचित सभापति गगन थापालाई ‘कमाण्डर’को संज्ञा दिँदै शर्माले नेतृत्व मात्र होइन, सम्पूर्ण पार्टी पंक्ति एउटै मनोविज्ञान र तयारीका साथ अघि बढ्नुपर्ने बताए । ‘गगन थापालाई हामीले कमाण्डर बनाएका छौँ तर कुनैपनि युद्धमा विजय हासिल गर्नलाई कमाण्डर दरिलो ढङ्गले उभिदै गर्दा पुरै सेना पनि उही तयारीका साथ उही मनोविज्ञानका साथ उभिनुपर्छ,’ उनले भने ।
विशेष महाधिवेशनपछि सबै प्रतिनिधिहरू विशेष जिम्मेवारी लिएर फर्किनुपर्ने उल्लेख गर्दै शर्माले पार्टीभित्र विनम्रता, आत्मीयता र आपसी सम्मानको संस्कार आवश्यक रहेको बताए । ‘तपाईं हामी प्रत्येक साथी आजका मितिबाट विशेष महाधिवेशनबाट फर्किदै गर्दा विशेष जिम्मेवारी पनि लिएर फर्किदैछौँ ।
नबिर्सिनुहोला हामीले हाम्रा पार्टीका साथीहरुसँग विनम्र र हार्दिक व्यवहार गर्नुपर्छ,’ उनले भने । महाधिवेशनपछि कारबाहीको विषय उठेको सन्दर्भमा उनले निर्वाचन आयोग स्वयं जानकार रहेको दाबी गरे । शर्माका अनुसार विशेष महाधिवेशनको बन्दसत्रले निर्वाचन प्रक्रिया सुरु गर्नुअघि बनाएको कार्यविधि तयार पार्दा केन्द्रीय कार्यसमिति विघटन भइसकेको अवस्था थियो ।
कांग्रेसको संघर्षशील इतिहास स्मरण गर्दै शर्माले पार्टीको शक्ति आलोचना र चुनौतीलाई अवसरमा बदल्ने क्षमतामा रहेको बताए । ‘विघटन भइसकेपछि बैठक बसेर हामीलाई कारबाही गरिँदा केवल हास्न मात्र सक्छौँ, मुस्कुराउन मात्र सक्थ्यौँ । कांग्रेस त्यो हो जसले अरुले हानेका ढुङ्गाहरु टिपेर महल बनाउन सक्छ,’ उनले भने ।
शर्माले पार्टीभित्रको आलोचना र गुनासोलाई त्यहीँ सीमित राख्दै संगठनलाई गाउँ–गाउँसम्म ऊर्जा र उत्साहका साथ लैजानुपर्ने आवश्यकता औँल्याए । ‘कांग्रेसले कांग्रेससँगको आलोचना र गुनासो छोडेर जनतामाझ आशा लिएर जानुपर्छ,’ उनको भनाइ थियो ।
