काठमाडौँ । काठमाडौँ क्षेत्र नं. ८ का उम्मेदवार राजेश शाक्यको जित सुनिश्चित गर्ने उद्देश्यले वडा नं. १३ मा चुनावी अभियान तीव्र रूपमा अघि बढाइएको छ। वडा नं. १३ का अध्यक्ष धुर्ब नारायण मान्नधर देखि सदस्यहरूसम्म एकढिक्का भई शाक्यको पक्षमा सक्रिय रूपमा परिचालन भएका छन् ।
घरदैलो कार्यक्रम वडा नं. १३ अन्तर्गत कालिमाटी क्षेत्रबाट सुरु गरिएको हो। कार्यक्रम प्रारम्भ गर्नु अघि टङ्केश्वरस्थित खुशी बहि मन्दिरमा दर्शन तथा पूजा अर्चना गरिएको थियो। धार्मिक आस्थासँगै जनसम्पर्कलाई जोड्दै अभियान अघि बढाइएको बताइएको छ।
घरदैलोका क्रममा उम्मेदवार शाक्यले स्थानीय बासिन्दासँग प्रत्यक्ष संवाद गर्दै पूर्वाधार विकास, सम्पदा संरक्षण, सरसफाइ व्यवस्थापन तथा स्थानीय रोजगारीका विषयमा आफ्ना योजनाहरू प्रस्तुत गरेका थिए। स्थानीयले पनि सडक स्तरोन्नति, ढल व्यवस्थापन, सार्वजनिक स्थल संरक्षणलगायतका मागहरू राखेका थिए।
अभियानमा स्थानीयको उल्लेखनीय तथा उत्साहजनक उपस्थिति देखिएको थियो। युवा, महिला तथा ज्येष्ठ नागरिकको सक्रिय सहभागिताले वडा नं. १३ मा चुनावी माहोल थप तातेको छ। वडा नेतृत्वसहितको एकढिक्का समर्थनले शाक्यको जिताउ अभियानलाई थप ऊर्जा मिलेको अभियान टोलीले जनाएको छ।
