तेहरान : युक्रेनी राष्ट्रपति भ्लोदिमिर जेलेन्स्कीले खाडी क्षेत्र तथा मध्यपूर्वमा इरानी ड्रोन आक्रमणको सामना गर्न २०० भन्दा बढी युक्रेनी सैन्य विज्ञहरू परिचालन गरिएको बताएका छन्।
लन्डनमा बेलायती संसद्का सांसदहरूलाई सम्बोधन गर्दै उनले २०१ जना एन्टी–ड्रोन विशेषज्ञहरू अहिले क्षेत्रमै सक्रिय रहेको र थप ३४ जना पठाउन तयार अवस्थामा रहेको जानकारी दिएका हुन्।
उनका अनुसार यी विशेषज्ञहरू इरानद्वारा डिजाइन गरिएका कामीकाजे ड्रोन—विशेष गरी शाहेद–१३६ ड्रोनको प्रतिकारमा दक्ष छन्। यस्ता ड्रोनहरू रुसले २०२२ देखि युक्रेनविरुद्धको युद्धमा प्रयोग गर्दै आएको छ।
युक्रेनी टोलीहरू संयुक्त अरब इमिरेट्स, कतार, साउदी अरबमा तैनाथ भइसकेको र कुवेततर्फ जाने क्रममा रहेको जेलेन्स्कीले बताए। साथै अन्य देशहरूसँग पनि सहकार्यका सम्झौताहरू भइसकेको उनको भनाइ छ।
उनले इरानले रुसलाई ड्रोन प्रविधि उपलब्ध गराएको र त्यसलाई अझ उन्नत बनाइएको दाबी गरे । हाल मध्यपूर्वमा प्रयोग भइरहेका केही ड्रोनहरूमा रुसी कम्पोनेन्टसमेत भेटिएको उनको दाबी छ।
यसैबिच जेलेन्स्कीले आफ्नो देशको ड्रोन युद्ध क्षमतामा उल्लेखनीय वृद्धि भएको उल्लेख गर्दै युक्रेन मोर्चामा रुसी क्षतिको करिब ९० प्रतिशत हिस्सा ड्रोन आक्रमणबाट भइरहेको दाबी गरे।
उनले इरान र रुसबिचको सैन्य सहकार्यलाई घृणामा आधारित साझेदारी भन्दै आलोचना गरेका छन्। साथै, यस्तो सहकार्यविरुद्ध अन्तर्राष्ट्रिय सहयोग आवश्यक रहेको पनि उनले बताएका छन्।
