काठमाडौं । १५ दिने युद्धविराममा रहेका अमेरिका र इरानबीच इस्लामाबादमा आज वार्ता हुँदै छ । वार्ताका लागि इरान र अमेरिकी दुवै मुलुकका प्रतिनिधिमण्डल पाकिस्तान पुगिसेका छन् ।
अमेरिका आफ्ना ६ बुँदामा सहमत भएमात्रै औपचारिक वार्तामा बस्ने अडानमा इरान रहेको अलजजिराले उल्लेख गरेको छ । इरानको पहिलो बुँदा लेबनानामा पनि युद्धविराम कार्यान्वयन हुनुपर्ने रहेको छ ।
इजरायलले लेबनानमा गरेको हमलामा हालसम्म दुई हजार बढीको मृत्यु भइसकेको छ । इजरायलले लेबनान युद्धविरामको हिस्सा नरहेको बताइरहँदा इरानले भने त्यहाँ पनि युद्धविराम लागू हुने अडान राखेको हो ।
दोस्रो, लइरानले आफूमाथि लागेका सम्पूर्ण प्रतिबन्ध हट्नैपर्ने अडान राखेको छ । इरानको यस अडानमा वासिङ्टनले सशर्त मान्न सकिने संकेत गरेको छ । परमाणु तथा क्षेप्यास्त्र विकास कार्यक्रमबाट पछि हटेमा इरानको यो माग सम्बोधन गर्न तयार रहेको अमेरिकाले संकेत गरेको छ ।
यस्तै इरानले स्ट्रेट अफ होर्मुजमाथिको आफ्नो अधिकार अमेरिकाले स्वीकार गर्नुपर्ने बताएको छ । त्यहाँको राजश्व निर्धारण आफूले नै गर्ने उसको सर्त छ । यता अमेरिकाले भने कुनै पनि सर्त र शुल्कबिना कन्टेनर छोड्नुपर्ने माग राखिरहेको छ ।
इरानले ६ साता लामो युद्धका कारण अमेरिकाले मुलुकमा पु¥याएको विध्वंसको क्षतिपूर्ति तिर्नुपर्ने माग राखेको छ । यस विषयमा अमेरिकाले औपचारिक प्रतिक्रिया केही दिएको छैन । इजरायल र अमेरिकाले इरानको क्षेप्यास्त्र कार्यक्रम पूर्ण रूपमा बन्द हुनुपर्ने माग राखेका छन् ।
इरानले यो सर्त इरानले पालना गर्न नसक्ने सन्देश दिइसकेको छ । यस्तै इरानले आफ्ना वरिपरि रहेका अमेरिका सैन्य फौज र संरचना हट्नैपर्ने भनेको छ ।
भविष्यमा कुनै पनि हमला नहुने सुनिश्चितता हुनुपर्ने माग राखेको छ । ट्रम्पले शान्ति वार्ता सम्पन्न भएको खण्डमा उक्त माग पुरा गर्न सकिने बताएका छन् ।
