काठमाडौं । हालैको विधानसभाको चुनावी नतिजापछि भारतको पश्चिम बंगाल राज्य अशान्त बनेको छ । चुनावी नतिजा घोषणापछि राज्यका विभिन्न क्षेत्रहरूमा हिंसा बढेको छ ।
चुनावी नतिजा सार्वजनिक भएदेखि राज्यमा पाँच जनाको हत्या भइसकेको छ । यी मध्ये तीन जना सत्तारुढ भाजपासँग र दुई जना तृणमूल कांग्रेस (टीएमसी)सँग सम्बन्धित रहेको भारतीय सञ्चारमाध्यमहरुले जनाएका छन् ।
यसैबीच, पश्चिम बंगालको उत्तर २४ परगनास्थित मध्यमग्राममा गएराति भाजपा नेता शुभेन्दु अधिकारीका पीए चन्द्रनाथ रथको गोली हानी हत्या भएको छ । रथ आफ्नो स्कार्पियो चलाएर घर फर्किरहेका थिए । गाडीमा चालक र अर्का एक व्यक्ति पनि थिए ।
रिपोर्ट अनुसार, बाइक र कारमा सवार आक्रमणकारीहरू पछाडिबाट आए, गाडी रोके र अन्धाधुन्ध गोली चलाएका थिए । चालकको सिटको छेउमा बसिरहेका चन्द्रनाथलाई छातीमा दुई गोली लागेको थियो । अर्को गोली उनको पेटमा लागेको थियो । कारमा रहेका अर्का एक जनाको पनि दाहिने हात, पेट र छातीमा गोली लागेको छ । चालक पनि घाइते भएका छन् । आक्रमणमा अस्ट्रेलियाली ग्लक पेस्तोल प्रयोग गरिएको थियो ।
यसैबीच, भाजपाले तृणमूल कांग्रेस (टीएमसी)लाई घटनाको योजना बनाएको आरोप लगाएको छ । टीएमसीले आरोप अस्वीकार गरेको छ र यस विषयमा सीबीआई अनुसन्धानको माग गरेको छ ।
गएराति नै बंगालको बसिरहाट जिल्लामा एक भाजपा कार्यकर्तामाथि पनि गोली प्रहार भएको छ । उनको अवस्था गम्भीर छ ।
