काठमाडौं : इजरायली सेनाले दक्षिणी लेबनानमा मध्ययुगीन कालमा बनेको एउटा किल्ला रहेको रणनीतिक पहाड कब्जा गरेको छ । यो विगत २६ वर्षयताकै लेबनानभित्र इजरायलको सबैभन्दा भित्री क्षेत्रसम्मको सैन्य घुसपैठ मानिएको छ । नबातिह सहरनजिक अवस्थित बोफोर्ट किल्ला कब्जा वरपरका गाउँहरूमा धेरै दिनसम्म चलेको भीषण लडाइँ र हवाई आक्रमणपछि सम्भव भएको एएफपीले जनाएको छ । इजरायली सेना उक्त दुर्गम क्षेत्रमा हिजबुल्लाहका सदस्यहरूसँग लडिरहेको थियो ।
गत मार्चको सुरुदेखि इजरायल–हिजबुल्लाह युद्ध सुरु भएयता यो कब्जालाई इजरायलका लागि ठूलो उपलब्धिका रूपमा हेरिएको छ । सन् १९४८ मा इजरायलको स्थापना भएदेखि नै युद्धको अवस्थामा रहेका यी दुई देश यतिबेला अमेरिकामा प्रत्यक्ष वार्तामा संलग्न छन् ।
इजरायली सेनाका अरबी भाषाका प्रवक्ता अविचाई अद्राईले एक्समा एउटा तस्बिर पोस्ट गरेका छन्, जसमा इजरायली सैनिकहरू किल्लाबाहिर हिँडिरहेको देखिन्छ । सन् २००० मा लेबनानबाट फिर्ता हुनुअघि इजरायली सेनाले यस किल्लालाई १८ वर्षसम्म आफ्नो नियन्त्रणमा राखेको थियो ।
यसैबीच, इजरायलका रक्षामन्त्री इजरायल काट्सले आइतबार सेनाले दक्षिणी लेबनानको रणनीतिक मध्ययुगीन किल्ला बोफोर्ट कब्जा गरेको पुष्टि गरेका छन् । सेनाले इरान समर्थित हिजबुल्लाहविरुद्ध भूमिगत कारबाही विस्तार गरिरहेको पनि जनाएको छ ।
“बोफोर्टको ऐतिहासिक युद्धको ४४ वर्षपछि, र पहिलो लेबनान युद्ध (१९८२) मा वीरगति प्राप्त गरेका सैनिकहरूको सम्झना गरिने आजको दिनमा, हाम्रा सैनिकहरू बोफोर्टको शिखरमा फर्किएका छन् र त्यहाँ पुनः इजरायलको झण्डा फहराएका छन्,” काट्सले आफ्नो टेलिग्राम च्यानलमा लेखेका छन् ।
इजरायलको सेनाले आइतबार आफ्ना सैन्यबलहरू इरान समर्थित हिजबुल्लाहसँग लडिरहेको लेबनानको दक्षिणी क्षेत्रमा आफ्नो सैन्य उपस्थिति मजबुत बनाउन विस्तारित भूमिगत कारबाहीअन्तर्गत अगाडि बढिरहेको जनाएको छ ।
इजरायली सेनाको विज्ञप्तिमा भनिएको छ, “ठूलो संख्यामा आईडीएफका स्थल सैनिकहरूले ‘फर्वार्ड डिफेन्स लाइन’ विस्तार गर्ने उद्देश्यका साथ आक्रामक कारबाही सुरु गरेका छन् र यो अपरेसन हाल थप क्षेत्रहरूमा विस्तार भइरहेको छ ।” साथै, उसका सैन्यबलहरूले लिटानी नदी पार गरिसकेको पनि सेनाले जनाएको छ ।
इजरायली सेनाले आइतबार जाहरानी नदीको दक्षिणमा बसोबास गर्ने लेबनानी नागरिकहरूलाई हिजबुल्लाहविरुद्धको कारबाही तीव्र पारिएकाले उक्त क्षेत्र खाली गर्न चेतावनी दिएको छ । सेनाका अरबी भाषाका प्रवक्ता अविचाई अद्राईले सामाजिक सञ्जालमा पोस्ट गर्दै भने, “दक्षिणी लेबनानका बासिन्दाहरू, तपाईंहरू तुरुन्तै जाहरानी नदीको उत्तरतर्फ जानुहोस् ।
