एथेन्स । उत्तरी ग्रिसकाे जंगलमा लागेकाे भीषण डढेलोमा परेर एउटा घर पूर्ण रूपमा जलेर नष्ट हुँदा २ जनाको मृत्यु भएको छ । घटनामा एक महिला घाइते भएकी छिन् ।
अग्नि नियन्त्रण निकायका अनुसार मंगलबार दिउँसो झाडी क्षेत्रमा सुरु भएको आगो तीव्र हावाका कारण छिट्टै फैलिएको थियो । त्यसपछि आगो थेसालोनिकी सहरबाट करिब २५ किलोमिटर टाढा रहेको लिटी गाउँ नजिकको वन क्षेत्रमा रहेको बस्तीसम्म पुगेको थियो ।
अग्नि नियन्त्रकहरूले आगो निभाउने क्रममा घरबाहिर एक पुरुषको शव फेला पारेका थिए । त्यसपछि जलेर ध्वस्त भएको घरभित्र अर्को व्यक्तिको शव भेटियो । सोही क्षेत्रबाट शरीरमा पोलेका घाउ भएकी एक महिलाको उद्धार गरिएको छ ।
आगो तीव्र रूपमा फैलिन थालेपछि स्थानीय प्रशासनले बासिन्दालाई तत्काल सुरक्षित स्थानमा जान निर्देशन दिएको थियो । उनीहरूलाई नजिकैको खेल मैदानमा सारिएको थियो ।
