धनगढी । सुदूरपश्चिम प्रदेशमा गएरातिदेखि निरन्तर वर्षा भइरहेको छ। प्रदेशका तराईदेखि पहाडी जिल्लासम्म वर्षा भइरहेकाले बाढी, डुबान र पहिरोको जोखिम बढेको भन्दै सम्बन्धित निकायले उच्च सतर्कता अपनाउन आग्रह गरेका छन्।
जल तथा मौसम विज्ञान विभाग, मौसम पूर्वानुमान महाशाखाका अनुसार कैलाली, कञ्चनपुर, दार्चुला, डडेल्धुरा लगायतका जिल्लामा निरन्तर वर्षा भइरहेको छ। केही स्थानमा भारी वर्षा पनि भइरहेको छ। नदी, खोला तथा पहिरोको जोखिम भएका क्षेत्रमा विशेष सावधानी अपनाउन विभागले अनुरोध गरेको छ।
जिल्ला प्रहरी कार्यालय कञ्चनपुरका डीएसपी टेकबहादुर रावतले कञ्चनपुरमा पनि गएरातिदेखि भारी वर्षा भइरहेको जानकारी दिए। उनका अनुसार हालसम्म बाढी, डुबान वा वर्षाका कारण कुनै अप्रिय घटनाको सूचना प्राप्त भएको छैन।
‘वर्षा निरन्तर भइरहेकाले प्रहरी सतर्क अवस्थामा छ। सर्वसाधारणलाई पनि आवश्यक सावधानी अपनाउन आग्रह गरेका छौँ,’ डीएसपी रावतले भने।
प्रहरी र स्थानीय प्रशासनले नदी तथा खोलाको सतह बढ्न सक्ने, कमजोर बस्ती र पहिरोको जोखिम भएका क्षेत्रमा विशेष सतर्कता अपनाउन तथा अत्यावश्यक कामबाहेक जोखिमयुक्त स्थानमा नजान सर्वसाधारणलाई अनुरोध गरेका छन्।
