तेहरान । इरानको इस्लामिक रिभोलुसनरी गार्ड कर्प्स (आईआरजीसी) का प्रमुख ब्रिगेडियर जनरल अहमद वहिदीले सर्वोच्च नेता आयातुल्लाह अली खामेनीको हत्याको बदला अवश्य लिइने चेतावनी दिएका छन्। अमेरिका र इजरायलविरुद्ध प्रतिशोध अपरिहार्य रहेको भन्दै उनले यो घटना इतिहासबाट कहिल्यै नमेटिने बताएका छन्।
सेपाह समाचार एजेन्सीले प्रकाशित गरेको वक्तव्यमा वहिदीले खामेनीको हत्याका दोषीहरूलाई न्यायको कठघरामा ल्याइने र विशेषगरी ‘बालबालिका हत्यामा संलग्न अमेरिकी सेना’विरुद्ध उचित जवाफ दिइने बताएका छन्। उनले भने, “अमेरिका र इस्लामिक क्रान्ति तथा प्रतिरोध मोर्चाका सबै शत्रुहरूले यस्तो कायरतापूर्ण हत्या गरेर प्रतिरोधको झण्डा कहिल्यै झुकाउन सक्दैनन् भन्ने बुझ्नुपर्छ।”
वहिदीले शहीदहरूको बदला लिनु र घटनाका जिम्मेवारलाई सजाय दिनु इरानको निश्चित, वैध र कहिल्यै नबिर्सिने माग रहने पनि बताएका छन्। उनको यो अभिव्यक्ति खामेनीको जन्मस्थान मशहदस्थित इमाम रेजा पवित्र धार्मिकस्थलमा बिहीबार अन्त्येष्टि सम्पन्न भएको केही समयपछि आएको हो।
खामेनी चार महिनाअघि तेहरानको मध्यभागस्थित आफ्नै परिसरमा अमेरिका र इजरायलले संयुक्त रूपमा गरेको हवाई आक्रमणमा आफ्ना परिवारका चार सदस्यसँगै मारिएका थिए। त्यसयता इरानले पटक–पटक अमेरिका र इजरायललाई यसको गम्भीर परिणाम भोग्नुपर्ने चेतावनी दिँदै आएको छ।
