वीरगञ्ज । आईसीपीबाट जाँचपास भई नेपाल प्रवेश गरेको ट्यांकरबाट अनधिकृत रूपमा पेट्रोलियम पदार्थ निकालेर बिक्री-वितरण गर्ने कार्यमा संलग्न सात जनालाई ट्यांकरसहित प्रहरीले पक्राउ गरेको छ ।
पर्साको वीरगञ्ज महानगरपालिका–१४ बाइपास सडकखण्डस्थित सौदागर आयल सेन्टरबाट पेट्रोल पम्प सञ्चालकसहित सात जनालाई ट्यांकरसहित पक्राउ गरिएको हो ।
बिहीबार साँझ करिब ५:१० बजे ना.७ ख १५३९ नम्बरको पेट्रोलियम पदार्थ बोकेको ट्यांकरमा लगाइएको सिल फलामको पाइपको हुक प्रयोग गरी उचालेर तेल निकालिरहेको अवस्थामा उनीहरू फेला परेको प्रहरीले जनाएको छ ।
पक्राउ पर्नेमा वीरगञ्ज महानगरपालिका–३ मालपोत चोकका ५५ वर्षीय सुनैन मियाँ, वीरगञ्ज–१५ लक्ष्मणवाका २३ वर्षीय असलम हवारी र वीरगञ्ज–११ श्रीपुरका २१ वर्षीय रफिक मियाँ रहेका छन् । मियाँ पेट्रोल पम्पका सञ्चालक, हवारी लेखा कर्मचारी र रफिक क्यासियर रहेको प्रहरीले जनाएको छ ।
त्यस्तै, मकवानपुरको हेटौँडा उपमहानगरपालिका–११ का २० वर्षीय सन्देश राना मगर र हेटौँडा–१० का ४६ वर्षीय केशर राम सुनार पनि पक्राउ परेका छन् । उनीहरू क्रमशः ना.७ ख २८०४ नम्बरको ट्यांकरका सहचालक र चालक हुन् ।
प्रहरीका अनुसार हेटौँडा–१४ का ५० वर्षीय मन्द सिंह लामा र सोही स्थानका २७ वर्षीय उमेश राना मगरसमेत पक्राउ परेका छन् । लामा ना।७ ख १५३९ नम्बरको ट्यांकरका चालक र राना मगर सोही ट्यांकरका सहचालक हुन् ।
घटनामा प्रयोग भएका ट्यांकरसहित उनीहरूलाई नियन्त्रणमा लिएर थप अनुसन्धान भइरहेको प्रहरीले जनाएको छ ।
