काठमाडौं । महालक्ष्मी विकास बैंकले बैंकको आधार दरमै सवारीसाधन कर्जा उपलब्ध गराउने घोषणा गरेको छ। काठमाडौंको भृकुटीमण्डपमा भदौ ९ गतेदेखि १४ गतेसम्म सञ्चालन भइरहेको १८औँ नाडा अटो शो २०२६ मा सहभागी हुँदै बैंकले यस्तो घोषणा गरेको हो।
बैंकका अनुसार सवारीसाधन खरिदका लागि आवश्यक कर्जासम्बन्धी परामर्श, सहजीकरण तथा समन्वय बैंकले गर्नेछ। विकास बैंकहरूमध्ये प्रतिस्पर्धी ब्याजदरमा सवारी कर्जा प्रदान गर्दै आएको बैंकले नाडा अटो शोको अवसरमा थप आकर्षक ब्याजदरमा कर्जा उपलब्ध गराउने जनाएको छ।
यस अवसरमा बैंकले कर्जाको प्रशासनिक शुल्कमा समेत विशेष छुट दिने भएको छ। बैंकका अनुसार भदौ महिनाका लागि हाल बैंकको आधार दर ५.६४ प्रतिशत रहेको छ। आधार दरमा कर्जा लिने ग्राहकले उक्त ब्याजदरको प्रत्यक्ष लाभ लिन सक्ने बैंकले जनाएको छ।
महालक्ष्मी विकास बैंकमार्फत सवारी कर्जा लिन इच्छुक ग्राहकले नाडा अटो शोको एन हल, स्टल नम्बर ०४ मा सम्पर्क गर्न सक्नेछन्। बैंकले विद्युतीय तथा अन्य निजी र व्यावसायिक सवारीसाधन खरिद गर्न चाहने ग्राहकलाई सहज, सरल र प्रतिस्पर्धी वित्तीय सेवा उपलब्ध गराउने जनाएको छ।
नाडा अटोमोबाइल्स एसोसिएसन अफ नेपालको आयोजनामा हरेक वर्ष हुँदै आएको अटो शोमा महालक्ष्मी विकास बैंकले विकास बैंकहरूमध्ये निरन्तर सहभागिता जनाउँदै आएको छ।
गुणस्तरीय वित्तीय सेवा प्रदान गर्दै आएको बैंकले हालै काठमाडौंको ज्ञानेश्वरमा कफी लाउञ्जसहितको डिजिटल हबसमेत सञ्चालनमा ल्याएको जनाएको छ।
