काठमाडौं– नेपाल मौसम विज्ञान विभाग, मौसम पूर्वानुमान महाशाखाले शुक्रबार साँझ देशका विभिन्न भूभागका लागि पाँच दिने विशेष मौसम चेतावनी बुलेटिन जारी गरेको छ । उक्त पूर्वसूचना अनुसार आज रातिदेखि मंगलबारसम्म देशका विभिन्न स्थानमा हल्कादेखि भारी वर्षा तथा मौसमजन्य विपद्को सम्भावना रहेको छ ।
मौसम महाशाखाले आम नागरिक तथा सरोकारवाला निकायहरूलाई विपद् जोखिम न्यूनीकरणका लागि आवश्यक सतर्कता अपनाउन अनुरोध गरेको छ । शुक्रबार मध्य तथा पूर्वी नेपालका जिल्लाहरूमा वर्षाको असर बढी देखिने प्रक्षेपण गरिएको छ । बागमती, गण्डकी, मधेस तथा कोशी प्रदेशका पहाडी र तराईका विभिन्न भूभागहरू रातो रंग अन्तर्गत प्रतिकार्य गर्नुपर्ने उच्च जोखिमको श्रेणीमा परेका छन् ।
त्यसैगरी पश्चिमी नेपालका सुदूरपश्चिम, कर्णाली र लुम्बिनी प्रदेशका धेरैजसो जिल्लाहरू सतर्क रहनुपर्ने सूचीमा राखिएका छन् । मधेस प्रदेशका दक्षिणी तराईका केही भागहरू भने पहिलो दिन कुनै पनि जिल्ला हरियो रंगको सुरक्षित सूचीमा परेका छैनन् । शनिबार मुलुकभर वर्षाको जोखिम थप तीव्र र व्यापक बन्ने अनुमान गरिएको छ । यस दिन सुदूरपश्चिम, कर्णाली, लुम्बिनी, गण्डकी र बागमती प्रदेशका ठूलो संख्यामा रहेका पहाडी तथा हिमाली जिल्लाहरू उच्च जोखिम श्रेणीमा समेटिएका छन् ।
पश्चिमी नेपालका तराई तथा पहाडी भागहरू सतर्क रहने अवस्थामा रहेका छन् । पूर्वी नेपालका कोशी र मधेस प्रदेशका जिल्लाहरूमा भने जोखिमको मात्रा घटेको जनाइएको छ । आइतबार देखि मौसम प्रणाली पश्चिमतर्फ सर्दै जाने र पूर्वी भागमा मौसममा सुधार आउने संकेत गरिएको छ । यस दिन सुदूरपश्चिम, कर्णाली र लुम्बिनीका अधिकांश पहाडी तथा हिमाली भूभागहरू सतर्क रहने सूचीमा यथावत् रहनेछन् ।
