टोकियो । जापानको ओकिनावा द्वीपमा एक अमेरिकी नौसैनिक (मरीन)लाई महिलाको हत्या र लुटपाटको आशंकामा पक्राउ गरिएको स्थानीय प्रहरीले जनाएको छ ।
ओकिनावाको नाहा सहरस्थित एक होटलको कोठामा शनिबार बिहान ३९ वर्षीया जापानी महिला अचेत अवस्थामा फेला परेकी थिइन् । घटनास्थलमै उनलाई मृत घोषित गरिएको प्रहरीले जनाएको छ ।
प्रहरीका अनुसार महिलाको शरीरको अवस्थाका आधारमा उनको हत्या भएको आशङ्का गरिएको छ । प्रहरीले घटनाको थप विवरण भने सार्वजनिक गरेको छैन ।
पक्राउ पर्ने अमेरिकी नौसैनिक २० वर्षीय रहेको र उनी ओकिनावामै रहेको अमेरिकी मरीन कोरको फुतेन्मा एयर स्टेसनमा कार्यरत रहेको प्रहरीले जनाएको छ । उनलाई आइतबार हत्या र लुटपाटको आशंकामा नियन्त्रणमा लिइएको हो ।
प्रहरीका अनुसार होटलमा जडान गरिएको सीसीटीभी फुटेजमा विदेशी नागरिकजस्तो देखिने एक छोटो कपाल काटेको पुरुष महिलासँगै होटलको कोठामा प्रवेश गरेको देखिएको थियो । केही समयपछि ती पुरुष महिलाका सामान हातमा बोकेर होटलबाट बाहिरिएको दृश्य पनि सीसीटीभीमा देखिएको प्रहरीले जनाएको छ ।
घटनाबारे अनुसन्धान जारी रहेको जापानस्थित अमेरिकी दूतावासले जनाएको छ । दूतावासले सामाजिक सञ्जाल एक्समार्फत एक अमेरिकी सैनिक ओकिनावामा एक जापानी नागरिकको मृत्यु भएपछि हिरासतमा रहेको जानकारी आफूले पाएको जनाएको छ ।
‘घटनाको तथ्य पत्ता लगाउन अनुसन्धान भइरहेका बेला अमेरिका जापान सरकार र स्थानीय अधिकारीहरूसँग सम्पर्क तथा सहकार्य गरिरहेको छ,’ दूतावासले भनेको छ ।
अमेरिकी समाचार संस्था सीएनएनले घटनाबारे अमेरिकी रक्षा मन्त्रालय (पेन्टागन) र अमेरिकी मरीन कोरसँग प्रतिक्रिया मागेको छ । उनीहरूको प्रतिक्रिया सार्वजनिक भइसकेको छैन ।
ओकिनावा जापानमा अमेरिकी सैन्य उपस्थितिको प्रमुख केन्द्र हो । त्यहाँ अमेरिकी सैनिकको ठुलो उपस्थिति रहेको कारण विगतमा पनि स्थानीय बासिन्दा र अमेरिकी सैन्य आधार बिचको सम्बन्ध तथा सैनिक संलग्न घटनालाई लिएर विवाद हुँदै आएको छ ।
यस घटनामा पक्राउ परेका अमेरिकी मरीन माथिको आरोप पुष्टि भइसकेको छैन । प्रहरीले घटनाको अनुसन्धान अघि बढाइरहेको छ ।
