चरिकोट । नेकपा एमालेले दोलखाको तामाकोसी गाउँपालिकामा शक्ति प्रदर्शन गरेको छ । चुनावी प्रचार अभियान अन्तर्गत नेकपा एमालेले तामाकोसी गाउँपालिकामा अन्तिम चुनावी सभाको आयोजना गरेको हो । उक्त चुनावी सभामा ठुलो सङ्ख्यामा जनताको उपस्थिति देखिएको छ ।
निर्वाचन प्रचार अभियान सकिने अघिल्लो दिन नेकपा एमाले तामाकोसी गाउँपालिकाले भव्य कार्यक्रमको आयोजना गरेको हो । कार्यक्रमलाई सम्बोधन गर्दै एमाले दोलखाका शीर्ष नेता, उम्मेदवार लगायतका नेताहरूले जिल्लाको तीन वटै सिट जित्ने उद्घोष गरेका छन् । कार्यक्रममा बोल्दै पोलिटब्युरो सदस्य आनन्द प्रसाद पोखरेलले एमालेको पक्षमा देखिएको जनलहरले जिल्लामा एमाले उम्मेदवारको जित सुनिश्चित भएको बताउनुभयो । ‘यो जनताको उपस्थितिले मङ्सिर ४ गते हुने प्रतिनिधिसभा र प्रदेशसभा निर्वाचनमा एमाले उम्मेदवारको जित सुनिश्चित भएको प्रमाण हो, पोखरेलले भन्नुभयो, ‘अब एमालेको विजयलाई कसैले रोक्न सक्दैन ।’ दोलखामा प्रतिनिधि सभा सदस्यका उम्मेदवार बालकृष्ण शिवाकोटी छन् ।
