२० लाख धरौटी तिरेर सन्दीप लामिछाने कारागारबाट रिहा भए

काठमाडौं । नेपाली क्रिकेट टिमका पूर्वकप्तान सन्दीप लामिछाने कारागारबाट रिहा भएका छन् । उनको तर्फबाट जिल्ला अदालत काठमाडौंमा २० लाख धरौटी रकम दाखिला गरेपछि केन्द्रीय कारागारबाट उनी छुटेका हुन् । 

उच्च अदालत, पाटनले सन्दीपलाई सर्तसहित धरौटीमा रिहा गर्न आदेश दिएको थियो । केन्द्रीय कारागारमा रहेका सन्दीपलाई अहिले कागजी प्रक्रियाका लागि अदालत लगिएको छ । सन्दीपको स्वागतका लागि सयौं समर्थक केन्द्रीय कारागार, सुन्धारा पुगेका छन् ।

लामिछानेलाई धरौटीमा छाड्न अदालतले ५ वटा सर्त राखेको छ । ती सर्त उलंघन भएको अवस्थामा पुर्पक्षका क्रममा धरौटी माग गर्ने आदेश स्वतः निष्कृय हुने भनिएको छ ।