काठमाडौँ–नेकपा एमालेका महासचिव शंकर पोखरेलले सरकारको डिजाइनमा सुनको धन्दा चलिरहेको बताउनुभएको छ । आज बिहान सुर्खेतमा पत्रकारसँग अन्तरक्रिया कार्यक्रममा उहाँले सुनको धन्दा सरकारले नै गरिरहेको बताउनुभयो ।
उहाँले भन्नुभयो, ‘अहिलेको सरकारले जे गरिरहेको छ यसरी देश चल्छ ? ललिता निवासको अनुसन्धान हेर्दा कसरी सुशासनमा लागेको छ भन्ने सरकार ? यी सबै काम सरकारकै डिजाइनमा भएकोले एमालेले संसद् अवरुद्ध गरेको हो ।’
महासचिव पोखरेलले नक्कली भुटानी शरणार्थी प्रकरण सरकारको भन्दा पनि अमेरिकन दबाबले अघि बढेको बताउनुभयो ।
उहाँले ललिता निवास प्रकरणमा मुछिएकाहरूको घरमा गएर अनुसन्धान तथा बयान लिएकोमा सीआईबीको आलोचना गर्नुभयो ।
