पाल्पा- पाल्पामा मंगलबार बेलुकी दश जनाको ज्यान जाने गरी भएको जीप दुर्घटनाको मुख्य कारण जिर्ण बाटो र क्षमताभन्दा झण्डै दोब्बर यात्रु सवार रहेका कारण भएको प्रहरीको प्रारम्भिक अनुशन्धानले देखाएको छ । उपचारको क्रममा थप दुईको मृत्यु भएपछि मृतकको संख्या बढेर दश पुगेको छ ।
१५ यात्रुको सिट क्षमता भएको मुस्ताङ्ग जिपमा चालकसहित २७ जना यात्रु सवार थिए । जिल्लाको तिनाउ गाउँपालिका वडा नं ६, चिदिसको लुम्पेकडाँडामा भएको जीप दुर्घटनामा स्थानीय दश जनाको घटनास्थलमै मृत्यु भएको छ भने १६ जना घाइते भएका छन् ।
सिद्धार्थ राजमार्गको डुम्रेबाट चिदिसको सिखरडाँडा जाँदै गरेको लु १ ज २३७१ नम्बरको मुस्ताङ जिप यो रुटमा विगत दश वर्षदेखि नियमित चल्दै आएको थियो । यस सडकलाई जिप पुरानै भए पनि बिडम्बना लुम्पेक डाँडामा हिजो मंगलबार बेलुकी ४ बजेर ५० मिनेटमा ठुलो आवाज सहित करिब तीन सय मिटर तल सडकमा आएर जिप बजारिन पुग्यो ।
जुन दुर्घटनाबाट एकै गाउँका चार जनासहित आफन्ती भेट्न पुगेका श्रीमनश्रीमतीले ज्यान गुमाएका छन् । स्थानीय दिनेश घिमिरेका अनुसार सो रुटमा नियमित चल्ने जिप भएपनि उकालो घुम्तीमा बढी लोड भएका कारण जीप ब्याक भएर दुर्घटना भएको बताउनुभयो ।
जीप ब्याक भएपछि चालक तानसेन-१० आमडाँडाका ४६ वर्षीय दानबहादुर चिदी पहिले नै झरेका कारण उनी बच्न भएका छन् । कच्ची बाटो त्यसमा उकालो घुम्ती रहेका कारण जीपको पट्टा भाँचिएको चालकले प्रहरी समक्ष बयान दिएका छन् ।
तिनाउ गाउँपालिका-६ का वडा अध्यक्ष टोम बहादुर पुनका अनुसार उकालोको घुम्तीमा धेरै लोड भएका कारण गाडी व्याक भई दुर्घटना भएको हुनसक्ने बताउनुभयो ।
जिल्ला प्रहरी पाल्पाका प्रमुख प्रहरी उपरिक्षक एसपी हेरम्ब शर्माले उकालो, घुम्ती र बढी क्षमताकै कारण घटना भएको प्रारम्भिक निष्कर्षमा पुगिएको जानकारी दिनुभयो । दुर्घटनामा घाइते १६ जनाको लुम्बिनी मेडिकल कलेज प्रभासमा उपचार भईराखेको छ ।
मृतकको सनाखतमा मंगलबार राति मात्र भएकोले आज विहानबाट मात्र शवको पोष्टमार्ट सुरु गरेर आफन्तलाई बुझाउने तयारी थालिएको पाल्पा प्रहरी प्रमुख शर्माले बताउनुभयो ।
मृतकमध्ये जिल्लाको तिनाउ गाउँपालिका ६ मस्यामका ६७ वर्षीय कृष्णबहादुर अस्लामी, ३९ वर्षीय रामबहादुर अस्लामी, २८ वर्षीय उर्मीला अस्लामीको र ६० वर्षीय यन कुमार पन्त रहनुभएको छ ।
यस्तै जिल्लाको रिब्दीकोट गाउँपालिका १ ख्याहाकी ६६ वर्षीय विष्णुकला विश्वकर्मा, सोही स्थानकी ६१ वर्षीय दिल कुमारी सुनार र तिनाउ गाउँपालिका २ की २० वर्षीय गीता सुनारको पनि मृत्यु भएको हो ।
यता आफन्त भेट्नका लागि हिंडेका रुपन्देहीको बुटवल उपमहानगरपालिका १४ का ७० वर्षीय चन्द्र बहादुर राणपाल र ६० वर्षीय चुना रणपालको पनि दुर्घटनामा परि ज्यान गएको छ । चन्द्र र चुना श्रीमान श्रीमती रहेको खुलेको प्रहरीले जनाएको छ ।
यसैगरि रुपन्देहीको देबदह नगरपालिका ५ बस्ने वर्ष २९ की दिलमाया जिसीको पनि मृत्यु भएको पाल्पा प्रहरीले पुष्टी गरेको छ ।
