काठमाडौं-प्रधानमन्त्री केपी शर्मा ओलीले दक्षिण एसियाली राष्ट्रहरूको शान्ति र समृद्धिका लागि साझा प्रयास हुनुपर्नेमा जोड दिनुभएको छ।
नेपाल अध्ययन भ्रमणमा रहेको भारतीय राष्ट्रिय रक्षा महाविद्यालय (एनडिसी)का शिक्षार्थीको प्रतिनिधिमण्डलसँगको भेटमा प्रधानमन्त्रीले दक्षिण एसियाको शान्ति र समृद्धि यस क्षेत्रको साझा एजेण्डा भएको बताउनुभयो। उहाँले गौतम बुद्ध, महात्मा गान्धीजस्ता व्यक्तित्वको जन्म भएको यस क्षेत्रमा हिंसा र विवाद उत्पन्न हुनु यहाँको संस्कृति र सभ्यता विपरीतका विषय हुने बताउनुभयो।
सोमबार प्रधानमन्त्री निवास बालुवाटारमा भएको भेटमा प्रधानमन्त्री ओलीले सो कलेजले रक्षा मामिलामा गर्दै आएको प्राज्ञिक योगदानको प्रशंसा पनि गर्नुभयो।
प्रधानमन्त्री ओलीले नेपाल र भारतबीच समान संस्कृति, रहनसहन र सभ्यताको चर्चा गर्दै दुई देशबिचको मित्रता अभिवृद्धि हुँदै गएको उल्लेख गर्नुभयो।
भेटमा नेपालका लागि भारतीय राजदूत नवीन श्री वास्तव, कलेजका प्रतिनिधि सन्दीप एस सन्दुकलगायत सहभागी हुनुहुन्थ्यो।
