काठमाडौँ । भारतको ग्वालियरस्थित एक होटलमा देह व्यापार भइरहेको सूचनाका आधारमा स्थानीय प्रहरीले छापा मारेको छ । भारतीय सञ्चारमाध्यमका अनुसार प्रहरीले उक्त होटेलको मेनेजर पदमा कार्यरत नेपाली युवती र दुई ग्राहकलाई पक्राउ गरेको छ । पक्राउ परेकी नेपाली युवतीको पहिचान सार्वजनिक गरिएको छैन ।
विश्वविद्यालय थाना क्षेत्रस्थित कैलाश नगरस्थित होटल स्मार्ट हवेली इनमा प्रहरीले छापा मारेको बताइएको छ । उक्त होटलका सञ्चालक दीपक शर्माको खोजी भइरहेको प्रहरीले जनाएको छ । प्रहरीले उक्त होटलमा फेला परेका ६ युवतीको बयान लिएर कारबाही प्रक्रिया अघि बढाएको छ । होटलका सञ्चालक, मेनेजर र दुई ग्राहकविरुद्ध देह व्यापारसम्बन्धी कसुरमा उजुरी दर्ता गरी कारबाही थालिएको प्रहरीको भनाइ छ ।
