काठमाडौं । काठमाडौंको भृकुटीमण्डपमा आजदेखि सुरु भएको नाडा अटो शो २०२५ मा विभिन्न ब्रान्डका सवारी साधन सार्वजनिक भइरहेका छन्। यसै क्रममा चीनको चांगनले आफ्नो नयाँ विद्युतीय मिनी कार ‘लुमिन’ नेपाली बजारमा प्रस्तुत गरेको छ।
कम्पनीले लुमिनको मूल्य रु. २२,९९,००० तोकेको छ, जसले यसलाई नेपाली बजारमा उपलब्ध सबैभन्दा किफायती ईभीमध्ये एक बनाएको छ। कम मूल्य भए पनि लुमिनमा आधारभूत विद्युतीय सुविधा र आधुनिक डिजाइन समावेश गरिएको छ।
यो मोडल विशेष गरी छोटो दूरीका सहरी यात्राका लागि लक्षित गरिएको हो। यसले शहरभित्र दैनिक आवतजावत सहज र ऊर्जा दक्षतापूर्वक सञ्चालन गर्न सक्ने दाबी गरेको छ।
प्रतिस्पर्धाको दृष्टिले, लुमिन केई, एमजि कोमोट र डोङफेङ मिनि ईभीसँग प्रत्यक्ष प्रतिस्पर्धा गर्नेछ। यसको किफायती मूल्य र सहरी प्रयोगमैत्री डिजाइनले उपभोक्ताको ध्यान खिच्ने अपेक्षा गरिएको छ।
नाडा अटो शोमा प्रदर्शित लुमिन जस्ता विद्युतीय मोडलले नेपाली बजारमा इ–मोबिलिटीको पहुँच बढाउने र दिगो यातायात प्रविधिलाई प्रवर्द्धन गर्ने विश्वास गरिएको छ।
