उदयपुर । नेकपा (एमाले)का सचिव शेरधन राईले पार्टी ‘रिफर्म’ (सुधार)सहित अघि बढ्ने बताएका छन् ।
सोमबार उदयपुरमा आयोजित जिल्ला कमिटीको १० औं विस्तारित बैठक तथा कार्यकर्ता भेलालाई सम्बोधन गर्दै उनले बदलिँदो राजनीतिक परिस्थिति, भदौ २३–२४ का घटनाक्रम र फागुन २१ को निर्वाचन परिणामपछि पार्टीले आत्मसमीक्षा गर्दै नयाँ कार्यदिशासहित अघि बढ्ने बताए । एमाले अहिले संगठनात्मक पुनर्संरचनासँगै विचार, कार्यशैली र रणनीतिक सुधारको चरणमा रहेको समेत उनले बताए ।
राईले वर्तमान अवस्थामा पार्टी कानुनी संघर्षसँगै सडक आन्दोलनमा समेत सक्रिय रहेको उल्लेख गर्दै आन्दोलनलाई प्रभावकारी बनाउन कार्यकर्ता एकता, अनुशासन र जनसम्पर्क विस्तार आवश्यक रहेकोमा जोड दिए । “पार्टी अहिले अदालतमा मात्र होइन, सडकमा पनि सक्रिय छ,” उनले भने ।
उनले निर्वाचन परिणाम र पछिल्ला राजनीतिक उतारचढावका कारणहरूको गहिरो समीक्षा भइरहेको जानकारी दिँदै सतही विश्लेषणभन्दा मिहिन रूपमा कमजोरी पहिचान गरी सुधार प्रक्रियालाई अगाडि बढाइने बताए । साथै, पार्टी अब गाउँ–टोल र समुदायसम्म पुगेर जनताका मुद्दासँग प्रत्यक्ष जोडिने रणनीतिमा केन्द्रित रहेको उल्लेख गरे ।
राईले राष्ट्रियता, लोकतन्त्र र विकासका मुद्दामा एमाले सधै अग्रपंक्तिमा रहने प्रतिबद्धता व्यक्त गर्दै कार्यकर्तालाई निराश नभई संगठन मजबुत बनाउन सक्रिय हुन आग्रह गरे । उनका अनुसार आत्मसमीक्षा, संगठनात्मक सुधार र जनआधारित आन्दोलनमार्फत पार्टी नयाँ ऊर्जा र संकल्पसहित अघि बढ्ने सन्देश उदयपुरबाट स्पष्ट रूपमा बाहिरिएको छ ।
झन्डै ६ घण्टाभन्दा लामो समय सञ्चालन भएको जिल्ला कमिटीको विस्तारित बैठक तथा कार्यकर्ता भेला कार्यक्रममा सहभागी करिब ३० जना अगुवा कार्यकर्ताले २०७४ यताका पार्टीका गतिविधिको समीक्षा गर्दै संगठन सुदृढीकरण, स्पष्ट राजनीतिक कार्यदिशा र सुधारमुखी नेतृत्वको आवश्यकता औँल्याएका थिए ।
