काठमाडौँ : अमेरिकी राष्ट्रपति डोनाल्ड ट्रम्पले इरानमाथि फेरि एकपटक विनाशको कडा धम्की दिएका छन्। युद्ध अन्त्य गर्ने स्थायी सम्झौतामा सहमत गराउन इरानमाथि दबाब बढाउने रणनीतिअन्तर्गत ट्रम्पको यस्तो आक्रोशपूर्ण अभिव्यक्ति बाहिर आएको हो।
राष्ट्रपति ट्रम्पले इरानका लागि समय निकै तीव्र गतिमा घर्किँदै गएको चेतावनी दिएका छन्। “इरानका लागि समय घर्किँदै छ। उनीहरूले छिट्टै सम्झौता गर्नु राम्रो हुनेछ,” ट्रम्पले उल्लेख गरेका छन्, “नत्र उनीहरूको केही पनि बाँकी रहने छैन।”
ट्रम्पको यो पछिल्लो धम्की आइतबार इजरायली प्रधानमन्त्री बेन्जामिन नेतन्याहुसँगको गम्भीर वार्तापछि आएको हो। प्रधानमन्त्री नेतन्याहुको कार्यालयले पनि दुई नेताबीच इरान मामिलामा संवाद भएको पुष्टि गरेको छ। यसअघि फेब्रुअरी २८ देखि इजरायल र अमेरिकी सेनाले इरानमाथि व्यापक संयुक्त हवाई आक्रमण सुरु गरेका थिए।
यसैबीच, इरानले अझै पनि विश्वको करिब २० प्रतिशत तेल र प्राकृतिक ग्यास ओसारपसार हुने महत्त्वपूर्ण होर्मुज जलमार्गमा आफ्नो नियन्त्रण कायमै राखेको छ। अर्कोतर्फ अमेरिकाले इरानी बन्दरगाहहरूमा कडा नाकाबन्दी जारी राखेको छ। दुवै देशको यो टकरावका कारण विश्व बजारमा तेलको मूल्य तीव्र रूपमा बढेपछि विश्वव्यापी महँगीको नयाँ संकट चुलिएको छ।
