काठमाडौं । प्रधानमन्त्री पुष्पकमल दाहाल प्रचण्डले सत्ता गठबन्धन पाँच वर्ष टिक्ने बताएका छन् ।
प्रचण्ड नेतृत्वको सरकार ढाल्ने गृहकार्य भएको भनी चर्चा भइरहेका बेला धादिङको आदर्श बहुमुखी क्याम्पस भवन उद्घाटन समारोहलाई सम्बोधन गर्ने क्रममा उनले यस्तो बताएका हुन् ।
उनले भने, ‘यो सरकारको आयु कति भनेर पनि मिडियामा हुने नहुने, तपाईँहरूले हेर्नुभएको होला, सुन्नुभएको होला। मैले प्रधानमन्त्रीको हैसियतमा गठबन्धनसँग लगातार भएको बैठकहरू र प्रतिपक्षसँग पनि भएको बैठकको आधारमा पाँच वर्ष यो गठबन्धन केही हुनेवाला छैन। हेर्नुहोला।’
नेपाली कांग्रेसभित्र प्रचण्ड नेतृत्वको सरकार ढाल्न दोस्रो तहका नेता जोडबलले लागिपरेका छन् ।
सोही क्रममा उनले बुढीगण्डकी जलविद्युत आयोजनालाई अघि बढाउने प्रतिबद्धता पनि जनाएका छन् ।
उनले गोरखाबाट चुनाव लड्दै गर्दा प्रतिबद्धता गरेको स्मरण गर्दै त्यो योजना अगाडि बढाउन सम्बन्धित निकायलाई निर्देश गरिसकेको बताए। धादिङ र गोरखाको विकासमा आफू लाग्ने जिकिर गरे।
भ्रष्टाचार नियन्त्रण, अर्थतन्त्रको सुधार गर्दै उद्देश्यमा आफू दृढ रहेको उनको भनाइ छ ।
