काठमाडौं : प्रभु बैंकका प्रमुख कार्यकारी अधिकृत(सिइओ) अशोक शेरचन हाजिरी जमानीमा छुटेका छन्।
विशेष सरकारी वकिल कार्यालयले शुक्रबार शेरचनलाई हाजिरी जमानीमा छाडेर अनुसन्धान जारी राख्न प्रहरीलाई निर्देशन दिएको छ। ‘उहाँलाई हिरासतमै राखेर अनुसन्धान गर्नुपर्ने थप कारण नदेखिएपछि हाजिरी जमानीमा छाड्ने निर्णय भएको छ,’ विशेष सरकारी वकिल कार्यालयका सूचना अधिकारी सहायक न्यायाधिवक्ता सरिता पोख्रेलले भनिन्, ‘उहाँमाथि प्रहरी अनुसन्धान भने चलिरहन्छ।’
शेरचनलाई नेपाल प्रहरीको केन्द्रीय अनुसन्धान ब्युरो(सिआइबी)ले मंसिर १४ गते पक्राउ गरेको थियो। २७ दिनको हिरासतमा राखेर अनुसन्धान गर्ने अनुमति दिएपछि विशेष सरकारी वकिल कार्यालयले समय नथप्ने निर्णय गरेको हो।
