नेपालगंज, २७ माघ : आम जनता पार्टी (आजपा)का नेतृ एवं बाँके–३ का उम्मेदवार विध्या शर्माले नेपालगंज स्थित भेरी अस्पताललाई मेडिकल कलेजको रुपमा विकास गर्नुपर्ने बताएकी छन् ।
नेपालगंज उपमहानगरपालिकाको जयसपुर, कर्भौना, परसपुर, साइगाउँमा चुनावी छलफल एवं भेटघाटका क्रममा शर्माले बाँके जिल्ला सुगम जिल्ला भए पनि यहाँका नागरिकले गुणस्तरीय स्वास्थय उपचार नपाएकाले यस क्षेत्रमा एक मेडिकल कलेजको आवश्यक्ता भएको बताइन् ।
‘नेपालगंज लुम्बिनी प्रदेशको मात्रै नभई कर्णालीको समेत केन्द्र हो । तर नेपालगंजमा बाँके जिल्लाका मात्रै नभई कर्णाली सहितका अन्य जिल्लाबाट उपचार गराउन विरामीहरु आउने गरेका छन् । तर यहाँको सरकारी अस्पतालको सेवासुविधा गरिब, निमुखा, आवाज विहीन जनताले स्वास्थ्य उपचार नपाएको गुनासो छ,’ शर्माले भनिन्, ‘यस क्षेत्रमा एक मेडिकल कलेजको आवश्यक्ता छ । नेपालगंजको भेरी अस्पताललाई मेडिकल कलेज बनाउन म पहल गर्छु । जसले यस क्षेत्रका नागरिकले राम्रो स्वस्थ्य उपचारका साथै विद्यार्थीहरुले एमबिबिएससम्मको पढाई पनि गर्न पाउँछन् ।’
बाँके जिल्लामा स्वास्थ्यका साथै खानेपानी, जेष्ठ नागरिकलाई दिनुपर्ने सेवा सुविधा, कृषी, सिचाई, मल, बिउ लगायतका विभिन्न समस्याहरु भए पनि यहाँबाट यसअघि चुनावमा जित्ने नेताहरुले काम नगर्दा आम नागरिक समस्या भोग्दै आइरहेको उनले बताइन् ।
बाँके–३ बाट आफू बिजयी भए यि समस्याहरुको ठोस रुपमा समाधान गर्दै यहाँका नागरिकलाई अत्याधिक सेवा सुविधा दिलाउन काम गर्ने प्रतिबद्धता शर्माले व्यक्त गरेकी छन् ।
बाँकेमा भ्रष्टाचार, आत्महत्या, सडक यातायात, बेरोजगारी, पर्यावरण लगायतका प्रमुख समस्या भएको आम नागरिकले बताउदै यसको समाधानका लागि शर्माले काम गर्ने बताइन् । सरकारी सेवासुविधामै अनियमितता, भ्रष्टाचार हुने गरेको र सर्वसधारण नागरिकले सेवा सुविधा नपाउने समस्यालाई समाधान गर्ने शर्माले जनाएकी छन् ।
यसैगरी बेरोजगारी, अशिक्षाका, पर्यावरण लगायतका समस्याको ठोस समाधान गर्ने एजेण्डा आजपाको रहेको उनले बताइन् । आफू बिजयी भए यहाँको शिक्षा, स्वास्थ्य, खानेपानी सहितका अन्य सेवासुविधा प्रभावकारी बनाउदै सबैलाई निशुल्क रुपमा उपलब्ध गराउने प्रतिबद्धता शर्माले व्यक्त गरेकी छन् ।
बाँके जिल्लाको समग्र विकाश सहित धार्मिक, सांस्कृतिक, ऐतिहासिक क्षेत्रको समृद्धि एवं विकासका लागि संघर्ष गर्दै आएको बताउदै उनले यसक्षेत्रको विकासका लागि निरन्तर अग्रपंक्तिमा रहेका काम गर्ने उनले जनाएकी छन् ।
