देश बिगार्ने र बनाउनेबिचको लडाइँ नै यो निर्वाचन हो : सन्तोष परियार

काठमाडौँ । प्रगतिशील लोकतान्त्रिक पार्टी (प्रलोपा) का अध्यक्ष सन्तोष परियारले आसन्न निर्वाचन पुरानो र नयाँ विचारबिचको टकराव तथा देश बिगार्ने र बनाउनेहरू बिचको लडाइँ भएको बताएका छन्। शनिबार काठमाडौँ क्षेत्र नम्बर १ का प्रलोपा उम्मेदवार सविन सिग्देलको  घरदैलो कार्यक्रम पश्चात बानेश्वरमा आयोजित कोणसभालाई सम्बोधन गर्दै अध्यक्ष परियारले मतदाताहरूलाई सचेततापूर्वक निर्णय गर्न आग्रह गरे ।

कोणसभामा बोल्दै अध्यक्ष परियारले पुराना र ठुला भनिने राजनीतिक दलहरूले लामो समय सत्ता चलाए पनि भ्रष्टाचार, नातावाद र कृपावादका कारण देश बन्न नसकेको आरोप लगाए। उनले जतिसुकै पढेलेखेका भए पनि युवाहरूले देशभित्रै रोजगारी पाउन नसकेको यथार्थ औँल्याउँदै अबको निर्वाचनलाई महिला, युवा, गरिब, दलित र सीमान्तकृत वर्गको पक्षमा अन्तिम फैसला गर्ने अवसरको रूपमा लिन मतदातालाई आह्वान गरे।

प्रलोपा अन्य पार्टीजस्तो सामान्य दल नभई जनआन्दोलनको मर्म र भावनालाई केन्द्रमा राखेर गठन भएको क्रान्तिकारी पार्टी भएको उनको दाबी थियो। समावेशी नेतृत्वको अभ्यास गरिरहेको यस पार्टीले मात्रै राष्ट्रको रक्षा गर्न सक्ने भन्दै उनले काठमाडौँ-१ का उम्मेदवार इन्जिनियर सबिन सिग्देललाई मतदान गर्न अपिल गरे।

परियारले सिग्देललाई एक पेसाकर्मी, युवा र भ्रष्टाचारमुक्त प्रतिनिधिको रूपमा चिनाउँदै देश विकासको सामर्थ्य उनीसँग भएको बताए। उनले लोकतन्त्र र संविधानको रक्षा गर्दै युवाहरूलाई रोजगारी दिन पार्टीको चुनाव चिह्न ‘आँखा’मा मतदान गर्न अनुरोध गरे।

सोही कार्यक्रमलाई सम्बोधन गर्दै काठमाडौँ क्षेत्र नम्बर १ का उम्मेदवार सबिन सिग्देलले भ्रष्टाचार र बेथितिविरुद्ध लडेका सहिद तथा युवाहरूको रगतको मूल्य खेर जान नदिने प्रतिबद्धता व्यक्त गरे। उनले देश हाल दुई किसिमका अतिवादको गम्भीर खतरामा रहेको औँल्याए। जुनसुकै हालतमा शासन सत्तामा टिकिरहन चाहने पुराना दलहरूको एउटा अतिवाद र टिभीको रिमोट थिचेजस्तै जादुमय ढंगले रातारात देशको कायापलट हुन्छ भन्ने अर्को लोकप्रियतावादी अतिवाद दुवै समाजका लागि घातक रहेको उनले बताए।

यी दुवै अतिवादले ठूलो जनसमुदायलाई किनारामा राख्ने भन्दै सिग्देलले आफू र आफ्नो पार्टी लोकतान्त्रिक विधि र पद्धतिमा विश्वास गर्ने विकल्पका रूपमा मैदानमा आएको प्रष्ट पारे। उनले न्यायप्रेमी मतदातालाई विवेक प्रयोग गरी आँखा चुनाव चिह्नमा मतदान गरेर विधिको शासन मान्ने युवा उम्मेदवारलाई विजयी गराउन आग्रह गरे। कार्यक्रममा पार्टीका केन्द्रीय सदस्य तथा प्रवास विभाग इन्चार्ज ओम शर्मा लगायतका नेता, कार्यकर्ता र स्थानीय मतदाताहरूको उल्लेख्य उपस्थिति रहेको थियो।