काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले न्याय पाउने पहिलो हक सहिदकी आमाको रहेको बताएका छन् । बिहीबार (चैत १९) मा बसेको पहिलो संसद् बैठकलाई सम्बोधन गर्दै उनले यस्तो बताएका हुन् ।
उनले जेनजी आन्दोलनमा भएको दमनको प्रकरणमा केही दिनअघि पक्राउ परेका एमाले अध्यक्ष केपी शर्मा ओली र पूर्वगृहमन्त्री रमेश लेखकका विरुद्धमा भइरहेको प्रदर्शनलाई लक्षित गर्दै भने, – “न्याय पाउने पहिलो हक सहिदकी आमाको हो, त्यसलाई प्रतिशोध भन्न पाइनेछैन ।”
त्यस्तै, लामिछानेले आफ्नो पार्टीले पाएको जनमत केवल सरकार चलाउनका लागि मात्र नभई विद्यमान व्यवस्था र कार्यशैली बदल्नका लागि भएको स्पष्ट पारे । उनले रास्वपाले प्राप्त गरेको मत नेपाली जनताको आशा र आक्रोशको प्रतिविम्ब भएको उल्लेख गरे ।
उनले जनताको भावना र मतादेशको कदर गर्दै जिम्मेवार भएर अघि बढ्ने प्रतिज्ञा समेत गरे । अब पार्टी र सरकारले बोलेर भन्दा पनि नतिजामुखी काम गरेर आफ्नो औचित्य प्रमाणित गर्नुपर्ने बेला आएको उनले बताए ।
सभापति लामिछानेले अब संख्याकै बलमा प्रतिशोध र अत्याचार नहुने र आस्थाकै आधारमा अब कसैलाई पनि फरक व्यवहार नहुने बताए ।
उनले आफूहरूमाथि चौबिसै घण्टा निगरानी गर्न प्रतिपक्षी दलहरूलाई आग्रहसमेत गरे । साथै, उनले आफ्ना सांसदहरूलाई प्रश्न सोधेर आएको सम्झाउँदै जिम्मेवारी पनि उति नै रहने बताए ।
