काठमाडौं । स्वास्थ्य तथा खाद्य स्वच्छतामन्त्री निशा मेहता ७९ औं विश्व स्वास्थ्य सभामा सहभागिता भई आज स्वदेश फर्किएकी छन् । मन्त्री मेहता स्विट्जरल्यान्डको जेनेभामा आयोजित ७९ औं विश्व स्वास्थ्य सभामा आफ्नो सफल सहभागिता र सम्बोधन सम्पन्न गरी आज स्वदेश फर्किएकी हुन् ।
त्रिभुवन अन्तर्राष्ट्रिय विमानस्थलमा आइपुगेकी मन्त्री मेहतालाई मन्त्रालयका उच्च पदस्थ अधिकारीहरूले स्वागत गरेका थिए । मे १८ देखि २३, २०२६ सम्म जेनेभामा सञ्चालन भएको यस वर्षको महासभा नेपालका लागि निकै ऐतिहासिक र उपलब्धिमूलक रहेको छ । यस ७९ औं विश्व स्वास्थ्य सभामा मन्त्री मेहतालाई सभाको उपाध्यक्षका रूपमा निर्वाचित गरिएको थियो । यो नेपालको स्वास्थ्य कूटनीति र अन्तर्राष्ट्रिय मञ्चमा नेपालको बढ्दो उपस्थितिका लागि ठूलो सम्मान हो ।
सभालाई सम्बोधन गर्ने क्रममा मन्त्री मेहताले नेपालको स्वास्थ्य क्षेत्रका प्राथमिकताहरू, महामारीको पूर्वतयारी, विश्वव्यापी स्वास्थ्य संरचनामा पहुँच र समानताको विषयमा नेपालको स्पष्ट धारणा राखेकी थिइन् । उनले जलवायु परिवर्तनले नेपालजस्ता पर्वतीय र विकासशील राष्ट्रहरूको जनस्वास्थ्यमा पारेको गम्भीर असरबारे विश्व समुदायको ध्यानाकर्षण गराएकी थिइन् ।
सम्मेलनको दौरान मन्त्री मेहताले विश्व स्वास्थ्य संगठनका उच्च अधिकारीहरू तथा विभिन्न सदस्य राष्ट्रका स्वास्थ्य मन्त्रीहरूसँग द्विपक्षीय वार्ता गर्दै नेपालको स्वास्थ्य प्रणालीको सुदृढीकरण र प्राविधिक सहयोग आदानप्रदानका विषयमा महत्त्वपूर्ण छलफल गरेकी थिइन् । नयाँ सरकार गठन भएपश्चात् अन्तर्राष्ट्रिय मञ्चमा मेहताको यो पहिलो उच्चस्तरीय प्रतिनिधित्व हो ।
स्वास्थ्य तथा खाद्य स्वच्छता मन्त्रालयले यस भ्रमणलाई नेपालको स्वास्थ्य क्षेत्रको अन्तर्राष्ट्रिय सहकार्यमा एक महत्त्वपूर्ण फड्को मानेको छ । मन्त्री मेहताले अब महासभामा पारित भएका नीतिहरू र नेपालले गरेका प्रतिबद्धताहरूलाई राष्ट्रिय स्वास्थ्य नीतिसँग जोडेर कार्यान्वयनमा लैजाने बताइन् ।
