किभ । युक्रेनमाथि रुसले गरेको पछिल्लो हवाई आक्रमणमा कम्तीमा ९ जनाको मृत्यु भएको छ । आक्रमणमा अन्य धेरै जना घाइते भएको बताइएको छ । आक्रमणका क्रममा किभस्थित एक ऐतिहासिक धार्मिक सम्पदामा समेत आगलागी र क्षति पुगेको युक्रेनी अधिकारीहरूले बताएका छन् ।
अधिकारीहरूका अनुसार राजधानी किभमा भएका आक्रमणमा ४ जनाको मृत्यु भएको छ । उत्तरपूर्वी शहर खार्किभमा आक्रमणपछि लागेको आगो निभाउने क्रममा ५ जना उद्धारकर्मीको ज्यान गएको छ । अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनसँग फोनमा कुराकानी गरेको केही घण्टापछि यो आक्रमण भएको हो ।
आक्रमणबाट ११औँ शताब्दीको ऐतिहासिक डोर्मिशन क्याथेड्रलमा गम्भीर क्षति पुगेको छ । युक्रेनकी प्रधानमन्त्री यूलिया स्विरीडेन्कोले यसलाई आफ्ना जनता र सम्पदामाथिको क्रूर आक्रमण भनेकी छिन् ।
यसैबिच, रुसको राजधानी मस्कोको दक्षिणमा रहेको तुला सहरमा युक्रेनी ड्रोन आक्रमण हुँदा ३ जनाको मृत्यु र १ वर्षीय बालकसहित ३ जना घाइते भएको रुसी अधिकारीहरूले बताएका छन् ।
किभका मेयर विटाली क्लिट्स्कोका अनुसार ड्रोन र क्षेप्यास्त्र आक्रमणका कारण भवन र सवारी साधनमा आगलागी भएको छ । राजधानीका १ लाख ४० हजारभन्दा बढी नागरिक विद्युत् सेवाबाट वञ्चित भएको बताइएको छ ।
सोमबार युक्रेनका अधिकांश क्षेत्रमा हवाई आक्रमणको चेतावनी जारी गरिएको थियो । किभमा भएका आक्रमणले धेरै आवासीय भवनलाई निशाना बनाएको बताइएको छ । यस घटनामा कम्तीमा २३ जना घाइते भएका छन् । खार्किभमा थप ५ जना घाइते भएका छन् ।
युक्रेनका विदेशमन्त्री एन्ड्री सिबिहाले सामाजिक सञ्जाल एक्समार्फत जारी गरेको वक्तव्यमा उक्त क्याथेड्रलमा भएको क्षतिलाई लिएर युनेस्कोलगायत अन्तर्राष्ट्रिय संयन्त्रहरूमा तत्काल पहल गरिने बताएका छन् ।
युक्रेनको छिमेकी पोल्यान्डले पनि किभमाथिको रुसी आक्रमणपछि सावधानी स्वरूप आफ्ना लडाकु विमान परिचालन गरेको तथा भूमिमा आधारित हवाई प्रतिरक्षा प्रणाली उच्च सतर्कतामा राखेको जनाएको छ ।
