चितवन : चितवनको राप्ती नगरपालिकाबाट १६८ किलो लागु औषध गाँजासहित दुई जनालाई प्रहरीले नियन्त्रणमा लिएको छ। सोमबार बिहान करिब ३:४० बजेको समयमा राप्ती नगरपालिकाको भित्री बाटो हुँदै पूर्व-पश्चिम राजमार्गसतर्फ जाँदै गरेको बा.प्र.०३-०१-०२३ च ५८२८ नम्बरको कारमा गाँजा ओसारपसार भइरहेको गोप्य सूचना प्रहरीले पाएको थियो। उक्त सूचनाका आधारमा खटिएको प्रहरी टोलीले राप्ती नगरपालिका वडा नं. १० स्थित चिप्लेटी भन्ने स्थानमा कारलाई रोकेर चेकजाँच गरेको थियो।
चेकजाँचका क्रममा प्रहरीले कार चालक डिल्लीराम थारू र कारमा सवार कर्ण बहादुर तामाङलाई नियन्त्रणमा लिएको छ। उनीहरूको शरीर तथा सवारी साधन खानतलासी गर्दा कारको पछाडिको डिक्कीभित्र रातो प्लास्टिकलाई बाहिरबाट सेतो पानी टेपले बेरेर चारपाटे आकारमा राखिएका १२ वटा पोका फेला परेका हुन्। ती पोकामा १६८ किलो गाँजा भेटिएपछि प्रहरीले उनीहरूलाई पक्राउ गरी कानुन बमोजिम मुचुल्का तयार पारेको छ।
पक्राउ परेका डिल्लीराम थारू र कर्ण बहादुर तामाङलाई दसीको सामानसहित चितवन जिल्ला अदालतमा उपस्थित गराई दिन ४ को म्याद थप गरेर अनुसन्धान अगाडि बढाइएको जिल्ला प्रहरी कार्यालय चितवनका सूचना अधिकारी प्रहरी निरीक्षक मनिष श्रेष्ठले जानकारी दिए।
