काठमाडौं । नेकपा (एमाले) ले उद्धार तथा राहत कार्यको स्थलगत अनुगमन, सूक्ष्म निगरानी र सरकारलाई आवश्यक समन्वय तथा सहजीकरण गर्न संसदीय विशेष समिति गठनको माग गर्ने निर्णय गरेको छ ।
सिंहदरबारमा मंगलबार बसेको एमाले संसदीय दलको बैठकले बुधबारबाट सञ्चालन हुने संसद बैठकमा संसदीय दलका नेताले सम्बोधन गर्ने र विशेष संसदीय समिति गठनका लागि माग गर्ने निर्णय गरेको एमाले संसदीय दलका प्रमुख सचेतक ऐन महरले जानकारी दिए ।
बैठकले बाढी–पहिरोमा ज्यान गुमाउनेहरूप्रति श्रद्धाञ्जली, घाइतेहरूको शीघ्र स्वास्थ्य लाभको कामना गर्दै बेपत्ताहरूको शीघ्र खोजी गर्न माग गरेको छ भने एमालेका प्रत्येक सांसदको १५ दिनको पारिश्रमिक राहत कोषमा जम्मा गर्ने निर्णय भएको महरले बताएका छन् ।
उनले बाढीपछिको उद्दार कार्य प्रभावकारी हुन नसकदा नागरिकको ज्यान जोगाउन सकिने अवसर गुमेको उल्लेख गरे । साथै उनले एउटै घरबाट २२ भन्दा बढी शव निस्कनु तथा समयमै उद्धार नहुँदा ५–७ दिनपछि मात्र शव फेला पर्नुले सरकारी संयन्त्रको कमजोरी देखाएको आरोप लगाए ।
त्यस्तै महरले सुरुङ तथा विभिन्न स्थानमा अझै शवहरू अलपत्र रहनु र परिवारलाई नबुझाई सामूहिक रूपमा गाडिनु उचित नभएको धारणा राखेका थिए ।
