काठमाडौं । गत २६ अगस्टमा आएको विनाशकारी बाढीका कारण रसुवालगायत देशका विभिन्न क्षेत्रमा ठूलो जनधनको क्षति भएको छ। बाढीका कारण कैयौँ परिवार घर, सम्पत्ति तथा आफन्त गुमाएर पीडामा छन्। विपत्तिपछि प्रभावित परिवारलाई राहत, पुनःस्थापना र पुनर्निर्माणका लागि सहयोगको आवश्यकता झनै बढ्दै गएको छ।
यही कठिन परिस्थितिमा बाढी प्रभावित परिवारको सहयोगका लागि यामाहा नेपाल परिवार एकजुट भएको छ। यामाहा २–व्हीलर डिभिजन, देशभर रहेका यामाहा डिलरहरू तथा यामाहा राइडरहरू राहत तथा सहयोग अभियानमा सहभागी भएका छन्। बाढी तथा विपद्बाट प्रभावित परिवारलाई सहयोग गर्ने उद्देश्यले यामाहा डिभिजन र देशभरका यामाहा डिलरहरूले संयुक्त रूपमा सोलिडारिटी फन्डमार्फत १५ लाख रुपैयाँ योगदान गरेका छन्। यससँगै यामाहा डिभिजनको जेन–जी टिमले पनि आफ्नो व्यक्तिगत बचतबाट १५ हजार रुपैयाँ सहयोग गरेको छ।
यामाहा नेपालका अनुसार विपत्तिको समयमा राष्ट्र र समुदायप्रति आफ्नो जिम्मेवारी निर्वाह गर्नु सबैभन्दा महत्वपूर्ण विषय हो। यही सामाजिक उत्तरदायित्वलाई आत्मसात् गर्दै यामाहा नेपाल परिवारले आफूले सक्ने माध्यमबाट प्रभावित समुदायलाई सहयोग गर्ने निर्णय गरेको हो।
बाढीबाट प्रभावित कतिपय परिवार अहिले पनि आधारभूत आवश्यकता पूरा गर्न संघर्ष गरिरहेका छन्। घरबार तथा सम्पत्तिमा क्षति पुगेका परिवारलाई तत्काल राहतसँगै दीर्घकालीन पुनःस्थापना र पुनर्निर्माणमा समेत सहयोग आवश्यक देखिएको छ। यस्तो अवस्थामा निजी क्षेत्रबाट हुने सहयोगले पीडित परिवारलाई राहतसँगै मनोबल र भरोसा प्रदान गर्ने अपेक्षा गरिएको छ।
यामाहा नेपाल परिवारले आफ्नो सामूहिक प्रयासबाट सहयोगको सबैभन्दा बढी आवश्यकता भएका परिवार तथा समुदायसम्म राहत पुर्याउन सकियोस् भन्ने अपेक्षा व्यक्त गरेको छ। विपत्तिको समयमा पीडितको साथमा उभिनु सामाजिक दायित्व मात्र नभई मानवीय जिम्मेवारीसमेत भएको यामाहाको भनाइ छ।
बाढीबाट प्रभावित क्षेत्रहरूमा पुनःस्थापना र पुनर्निर्माणको प्रक्रिया लामो हुन सक्ने भन्दै यामाहा नेपालले प्रभावित समुदायसँग आगामी दिनमा पनि आफूले सक्ने हरेक माध्यमबाट साथ र सहयोग जारी राख्ने प्रतिबद्धता जनाएको छ।
यामाहा नेपालका अनुसार विपत्तिको घडीमा एक–अर्काको साथमा उभिने संस्कारलाई बलियो बनाउँदै प्रभावित परिवारलाई पुनः सामान्य जीवनतर्फ फर्किन सहयोग गर्नु अहिलेको प्रमुख आवश्यकता हो। यही भावनाका साथ यामाहा परिवारले राहत तथा सामाजिक सहयोगलाई निरन्तरता दिने जनाएको छ।
