काठमाडौँ: रवि लामिछानेले आफ्नो नेतृत्वमा राष्ट्रिय स्वतन्त्र पार्टी दल दर्ता गर्न खोजेको विषयमा आफ्नो गम्भीर ध्यानाकर्षण भएको भन्दै निर्वाचन आयोगमा उजुरी परेको छ ।
स्वतन्त्र उम्मेदवारी अभियान पश्चात् अन्य स्वतन्त्र उम्मेदवारहरू पनि निर्वाचन आयोगका प्रमुख निर्वाचन आयुक्त दिनेश कुमार थपलियालाई निवेदन दिएका छन् ।
मनोज पण्डित सहित राजकुमार बजगाईं, पुस्कर शाह लगायतले संयुक्त निवेदन दिँदै रवि लामिछानेले राष्ट्रिय स्वतन्त्र पार्टी दर्ताका लागि निर्वाचन आयोगमा दिएको निवेदन खारेजीको माग गरेका छन् । फिल्म निर्देशक समेत रहेका मनोज पण्डितले ‘स्वतन्त्र पार्टी विरुद्ध स्वतन्त्र उम्मेदवार’ लेखेका छन्। पूर्व सञ्चारकर्मीले आफ्नो पार्टीको नाममा स्वतन्त्र शब्द राखेसँगै स्थानीय तहमा देशैभरि स्वतन्त्र उम्मेदवार दिएका र आसन्न प्रदेश तथा संघीय निर्वाचनमा स्वतन्त्र उम्मेदवारी घोषणा गरेका वा स्वतन्त्र उम्मेदवारीको तयारी गरेका वास्तविक स्वतन्त्र व्यक्ति समूहरसंस्थालाई गम्भीर आघात पुगेको उल्लेख छ ।
निर्देशक पण्डितले लामिछानेले माग गरेको स्वतन्त्र नाममा आफू जस्ता स्वतन्त्र उम्मेदवारको विमति रहेको उल्लेख गरेका छन्। लामिछानेको पार्टीको नामबाट स्वतन्त्र शब्द हटाउन आग्रह गर्दै दिएको उजुरीमा उल्लेख छ, ‘ स्वतन्त्र शब्दको आफ्नै महत्त्व छ र यसले दलीय भिडबाट फरक बनाउन विशेष अर्थ बोक्छ। स्वतन्त्र शब्द दललाई दिँदा हामी जस्ता स्वतन्त्र उम्मेदवारहरूलाई असहज परिस्थितिको निर्माण हुनेछ । साथै, यसले जनतामा भ्रम गरी स्वतन्त्र शब्दको अपव्याख्या हुने भएकाले उक्त दलको नामको विषयमा निर्णय लिँदा गहन विश्लेषण गर्न अनुरोध छ ।’
लामिछानेको पार्टीलाई स्वतन्त्र उम्मेदवार अभियान, अभियन्ता र देशभरिमा स्थानीय, प्रदेश र संघीय तहमा स्वतन्त्र उम्मेदवार दिने कुनै पनि स्वतन्त्र उम्मेदवारहरूको समर्थन–सहकार्य नरहेकोसमेत उजुरीमा उल्लेख छ । आसन्न प्रतिनिधि सभाको निर्वाचनमा काभ्रेपलाञ्चोक क्षेत्र नं। १ बाट स्वतन्त्र रूपमा उम्मेदवारी दिएका मनोज पण्डितलगायतले रविविरुद्ध उजुरी दर्ता गराएका हुन् ।
