काठमाडौं । अभिनेत्री शिल्पा पोखरेलले श्रीमान् छवि ओझाविरुद्ध काठमाडौं जिल्ला अदालतमा हालेको मुद्दा फैसला भएको छ । जिल्ला अदालतले शिल्पालाई छविले आफ्नो आधा सम्पत्ति दिनुपर्ने फैसला सुनाएको छ भने उनीहरूको डिभोर्स पनि टुंग्याइदिएको छ।
चौथो श्रीमतीका रूपमा शिल्पालाई भित्र्याएका उनहिरूबीच आपसी विवादका कारण वैवाहिक जीवन लामो समय टिक्न सकेन। अन्ततः उनीहरू सम्वन्धविच्छेदका अदालत गएका थिए।
शिल्पाले छविसँग सम्वन्धविच्छेद र माना चामलको मुद्दा हालेकी थिइन्। उक्त मुद्दामा हिजो फैसला सुनाउँदै अदालतले छविको सम्पत्ति उनले आधा पाउने फैसला गरेको हो। शिल्पासँग सम्बन्धमा रहँदासम्म छविलाई लागेको ऋण पनि आधा शिल्पाले व्यहोर्नुपर्ने अदालतको फैसला छ।
छविको दोस्रो श्रीमती स्व.गिताञ्जली सुनुवारको तर्फबाट एक छोरा छन्। गिताञ्जलीको मृत्युपछि छविले आफ्नो श्रीमती जेठीसासु (गीताञ्जलीकी दिदी)को जिम्मा लगाएका थिए। त्यसबेला छविले आफ्नो छोरालाई धर्मपुत्रका रूपमा पाल्न जेठीसासुसँग लिखित सम्झौता नै गरेका थिए।
शिल्पाले सम्पत्तिको मुद्दा हालेपछि छविकी जेठी सासुले धर्मपुत्र फिर्ता गर्नका लागि अदालतका मुद्दा हालेकी थिइन्। छविकै आग्रहमा उनले सो मुद्दा हालेकी हुन्, ताकि आफ्नो छोराका नाममा पनि एक तिहाइ सम्पत्ति उनले राख्न सकुन्।
यदि धर्मपुत्र छविले फिर्ता पाउने अदालतले फैसला गरेको भए सम्पत्ति तीन भाग लाग्ने थियो। तर, अदालतले धर्मपुत्रलाई अंश छुट्याउन नमिल्ने फैसला गरेको छ।
छविको जायजेथा र ऋणको सबै लेखाजोखा भइसकेको छ। छविले आफ्नो ऋण २० करोडभन्दा माथि देखाएको बुझिन्छ। छविको आधा सम्पत्तिबाट ऋणको आधा रकम कटाएर शिल्पाले पाउने छिन् ।
शिल्पाले सामाजिक सञ्जालमा स्टाटस लेख्दै अदालतको फैसलाप्रति खुशी व्यक्त गरेकी छन् । तर, छविले चाहिँ उच्च अदालतमा पुनरावेदन गर्ने तयारी गरेको बुझिएको छ ।
