काठमाडौं । ललितपुरको इमाडोलमा बस दुर्घटना हुँदा १८ जना घाइते भएका छन्।
शनिबार बिहान सवा पाँच बजे लुभुबाट लगनखेल आउँदै गरेको बा २ ख ८५८३ नम्बरको बस इमाडोलको बीच सडकमै पल्टिएको हो।
बसमा २४ जना सवार भएपनि १८ जना घाइते भएको प्रहरी परिसर जावला खेलका प्रहरी प्रमुख एसएसपी सिद्धीविक्रम शाहले जानकारी दिए ।
घाइते भएका १८ जनालाई उद्धार गरी उपचारका लागि बी एन्ड बी अस्पताल लगिएको शाहले जानकारी दिए । उनका अनुसार सबै घाइतेहरू खतरामुक्त रहेका छन् ।
बसका चालक २४ वर्षीय सुजन पनि घाइते छन्। उनको पनि सोही अस्पतालमा उपचार भइरहेको एसएसपी शाहले बताए ।
प्रहरीले तीव्र गतिका कारण दुर्घटना भएको अनुमान गरेको छ।
‘बस करिब १० मिटर घिस्रिएको छ, दुर्घटना कसरी भयो भन्ने अनुसन्धानमै छौं’ शाहले भने । घाइतेहरूको उपचार भइरहेको र परिचय खुलिनसकेको पनि उनले जानकारी दिए।
तस्विरः पूर्णप्रसाद श्रेष्ठ
