काठमाडौँ । रास्वपा सांसद सुमना श्रेष्ठले सरकारले ल्याएको सामाजिक सञ्जालसम्बन्धी विधेयकको विरोधमा युवाहरूले अभियान सुरु गरेको भन्दै सरकारलाई युवाहरूको आवाज सुन्न आग्रह गरेकी छन् । बिहीबारको प्रतिनिधिसभा बैठकको आकस्मिक समयमा बोल्दै सांसद श्रेष्ठले के युवाले माइतीघर मण्डलामा तोडफोड गरे, सार्वजनिक सम्पत्तिमा ढुंगामुढा गरे भने मात्रै सरकारले युवाहरूको आवाज सुन्ने हो भन्दै प्रश्न गरिन् ।
उनले सामाजिक सञ्जालमा युवाहरूले सामाजिक सञ्जाल विधेयकबारे अभियान सुरु गरेको भन्दै त्यसमा वाक स्वतन्त्रता हननको कुरा गरिएको बताइन् । ‘के यो आवाज सरकारले सुन्छ, विधेयकहरु ल्याउँदै गर्दा सरोकारवालासँग छलफल गर्छ, युवालाई बोलाउनुस् । आवाज सुन्नुस्’, उनले भनिन्, ‘पेलेर जाने होइन, दम्भ देखाउने होइन । यो विधेयकप्रति युवाहरूले गरेको विरोध सरकारले सम्बोधन गरोस् ।’
