काठमाडौँ । श्रम, रोजगार तथा सामाजिक सुरक्षामन्त्री शरतसिंह भण्डारीले द्वन्द्वग्रस्त क्षेत्रमा रहेका नेपालीहरूको उद्धारको लागि तयारी अवस्थामा रहेको बताएका छन् । शुक्रबार काठमाडौँमा आयोजित श्रम प्रवासन, लैङ्गिक समानता र जलवायु परिवर्तनको सन्दर्भमा व्यापार तथा मानवअधिकारसम्बन्धी बहुपक्षीय सरोकारवाला नीति संवाद कार्यक्रमलाई बोल्दै मन्त्री भण्डारीले नेपालीहरूको उद्धार गर्नुपर्ने अवस्था आएको खण्डमा तत्काल उद्धार गर्न सकिने गरी संयन्त्रको विकास गरिएको बताएका हुन् ।
‘धेरै नेपालीहरू बम बङ्करमा रात बिताइरहेका छन् । यदि स्थिति थप जटिल भयो भने उद्धारका लागि सरकार तयार छ,’ उनले भने । नेपाली श्रमिकको सुरक्षा, सम्मान र अधिकार सुनिश्चित गर्न सरकार पूर्ण रूपमा प्रतिबद्ध रहेको बताए । उनले हालै जेनेभामा सम्पन्न ११३ औँ अन्तर्राष्ट्रिय श्रम सम्मेलनमा नेपालले श्रम तथा आप्रवासन क्षेत्रमा कार्यरत अन्तर्राष्ट्रिय निकायहरूसँग भएको छलफल सकारात्मक रहेको बताए । व्यापार, आप्रवासन र मानव अधिकारबीचको अन्तरसम्बन्धलाई विशेष रूपमा जोड दिएको बताए । जिम्मेवार व्यापार अभ्याससँगै श्रमिकको मानवअधिकारको रक्षा सरकारको सर्वोच्च प्राथमिकता भएको बताए ।
उनले नेपाली श्रमिकमाथि हुने शोषण र विभेदप्रति शून्य सहनशीलताको नीति लिइएको जिकिर गरे । वैदेशिक रोजगारी केवल आम्दानीको स्रोत मात्र नभई श्रमिकको गरिमा र अधिकारको विषय भएको बताए । नेपाली श्रमिकहरूले श्रम गन्तव्य मुलुकको विकासमा उल्लेखनीय योगदान दिइरहेको बताउँदै ती मुलुकहरूले सुरक्षित, व्यवस्थित र नियमित आप्रवासन सुनिश्चित गर्न ग्लोबल कम्प्याक्टको मर्म अनुसार व्यवहार गर्नुपर्ने बताए । उनले हाल विभिन्न मुलुकहरूमा अवैध रूपमा रहेका नेपालीहरूलाई वैध बनाउने पहल भइरहेको बताए । यसका लागि विशेष गरेर महिला श्रमिकहरूको सुरक्षालाई प्राथमिकता दिइएको मन्त्री भण्डारीले बताए ।
