काठमाडौँ । आम जनता पार्टी (आजपा)का अध्यक्ष एवं पूर्वमन्त्री प्रभु साहले राष्ट्रियता, लोकतन्त्र र मुलुकको अर्थतन्त्र जोगाउनका लागि सडक सङ्घर्षको विकल्प नभएको बताएका छन् । आजपा काठमाडौँ उपत्यका विशेष कमिटीको आज काठमाडौँको कोटेश्वरमा बसेको बैठकलाई सम्बोधन गर्दै उनले मुलुकलाई ध्वस्त बनाउनेका विरुद्धमा हुने आन्दोलनमा सहभागिताका लागि तयार रहन आह्वान समेत गरे ।
‘अहिले राष्ट्रियता, लोकतन्त्र र मुलुकको अर्थतन्त्र खतरामा छ । मुलुकलाई ध्वस्त बनाउँदै आफ्नो स्वार्थ सिद्ध गर्न खोज्नेका विरुद्धमा सडक संघको विकल्प छैन । मुलुकलाई बरबाद बनाउने, ध्वस्त बनाउनेका विरुद्धमा सडक आन्दोलनमा सहभागिताका लागि म सबैमा हार्दिक आह्वान गर्दछु,’ आजपा अध्यक्ष साहले भने ।
उनले झुटो बोल्नेको सरदार नै प्रधानमन्त्री एवं एमाले अध्यक्ष केपी शर्मा ओली भएको टिप्पणी समेत गरे । आजपा अध्यक्ष साहले पार्टीले विगतमा नै कारबाही गरी निकालिसकेका व्यक्तिलाई हुँदै नभएको पद भन्दै ओलीले पार्टी प्रवेश गराएर झुट र भ्रमपूर्ण कुरा गर्दै प्रचार गरिरहेको बताए ।
आजपा काठमाडौँ उपत्यका विशेष कमिटीका इन्चार्ज त्रिभुवन साहको अध्यक्षतामा सम्पन्न सो बैठकमा पार्टीका सहअध्यक्ष तिलक थापामगर, उमेश कुशवाहा, धनकुमारी मगर, देवेन्द्र ठाकुर, पशाङ तामाङ, रामकेवल गुप्ता, अमर लिम्बु, रञ्जु साह, सुरेश साह, आर्या पाण्डे, देवेन्द्र ठाकुर, निरन्जन पौडेल, राम विष्ट लगायतको विशेष सहभागिता रहेको थियो ।
