काठमाडौं । उत्तराखण्डको चमोली जिल्लास्थित पिपलकोटीमा टीएचडीसीको निर्माणाधीन सुरुङमा फसेका मजदुरमध्ये सातजनाको मृत्यु भएको छ । सुरुङमा पानी र पहिरोको लेदो पसेपछि ठूलो दुर्घटना भएको छ । दुर्घटनाका बेला सुरुङभित्र २० देखि २२ जना मजदुर काम गरिरहेका थिए ।
उद्धार अभियानका क्रममा सुरुङबाट निकालिएका १९ जनालाई गोपेश्वर जिल्ला अस्पताल लगिएको थियो । अस्पतालमा चिकित्सकहरूले तीमध्ये सातजनालाई मृत घोषित गरेका छन् ।
१० जना अस्पताल भर्ना, एक गम्भीर घाइते
अस्पतालका चिकित्सक डा. आयुषका अनुसार उद्धार गरिएका बाँकी मजदुरहरूको अवस्था तुलनात्मक रूपमा स्थिर छ । १० जनालाई अस्पतालमा भर्ना गरिएको छ भने एकजना गम्भीर घाइते युवकलाई थप उपचारका लागि श्रीनगरस्थित बेस अस्पताल रेफर गरिएको छ ।
राष्ट्रिय विपद् प्रतिकार्य बल र राज्य विपद् प्रतिकार्य बलका टोलीले सुरुङभित्र लगातार राहत तथा उद्धार कार्य सञ्चालन गरिरहेका छन् ।
राष्ट्रिय विपद् प्रतिकार्य बलका अधिकारी अमृत लाल मीणाले सुरुङभित्र ठूलो मात्रामा पानी भरिएकाले उद्धार अभियानमा कठिनाइ भइरहेको बताए । गल्फन्युज
